د طالبانو حکومت دوبۍ کې افغان کونسلګرۍ ته خپل استازی ټاکلی
![ae9f8af1 d08d 4247 b4c7 29529fd80a17](https://afghannow.net/wp-content/uploads/2023/03/ae9f8af1-d08d-4247-b4c7-29529fd80a17.jpg)
د طالبانو حکومت دننه سرچینو ويلي چې په دوبۍ کې د افغان قونسلګرۍ واک دوی ته ورکړل شوی دی
طالبانو دا په یوه بل پسې سفارتي او سیاسي لاسته راوړنه بللې ده.
د طالبانو بهرنیو چارو وزارت رسنیو ته ويلي:” پدې اړه چې اعلامیه برابره شوه ستاسو سره به هغه شریکه کړو”.
ویل کیږي چې طالبانو د عبدالرحمان فدا په نوم کس د قونسلګرۍ چارو سمبالوونکی معرفي کړی.
نوموړي په کابل کې د طالبانو بهرنیو چارو وزارت کې کار کاوه او امیر خان متقي ته نږدې کس بلل کېږي.
له دې مخکې طالبانو د افغانستان په ګاونډ ایران کې ديپلوماتیک ماموریت تر لاسه کړی و.
د ایران او طالبانو بهرنیو چارو وزارتونو هغه مهال د دیپلوماتانو بدلون یو معمولي کار بللی و.
په ایران کې افغان سفارت ته د طالبانو لېږل شوي استازي په ایران کې طالبانو ته د افغان سفارت چارو سمبالول چې ډېرو یې ګمان نه کاوه که له یوې خوا په سیاسي ډګر کې د طالبانو لویه لاسته راوړنه بلل شوې له بلې خوا یې د ځينو پراخ غبرګونونونه هم را وپارول.
له دې سره هم مهاله د ترکیې په استانبول کې افغان قونسلګرۍ هم طالب پلاوي ته سپارل شوې وه
په ترکیه کې د مېشتو ځينو افغانانو د مالوماتو له مخې د طالب دېپلوماتانو تر څنګ د جمهوریت ځينې کارکونکي هم په ګډه د قونسلګرۍ چارې سمبالوي.
له دې مخکې په قطر او پاکستان کې هم د افغانستان استازولۍ یو په بل پسې طالب چارواکو ته سپارل شوې.
په اسلام اباد او دوحه کې د سفارتونو تر څنګ په کراچۍ ، کوټه او پېښور کې طالب دېپلوماتان د افغان استازولیو چارې پر مخ وړي.
په روسیه، چین او ترکمنستان کې هم د ځينو طالب دېپلوماتانو حضور منل شوی.
د طالبانو بهرنیو چارو وزارت که څه هم هېوادونه نه په ډاکه کوي خو وایې د یادو هېوادونو تر څنګ په ځينو نورو هېوادونو کې هم د دوی استازي کار کوي.
طالبان داسې مهال یو په بل پسې له افغانستانه بهر د هېواد په استازیتوب سفارتونه تر لاسه کوي چې د طالبانو حکومت هیڅ کوم هېواد په رسمیت نه دی پيژندلی خو خپله ځينو هېوادونو هم په کابل کې خپل سفارتونه فعاله ساتلي.
که څه هم طالبان د نړۍ په یو شمیر هیوادونو کې د افغانستان سفارتونه دوی ته سپارل په راتلونکي کې د دوی په رسمیت پیژندلو کې موثر بولي خو ځینې شنونکي بیا دا یوه اړتیا بولي او وایي چې دا چار د طالبانو حکومت په رسمیت پیژندنه کې کوم رول نشي لوبولی.