د روسیې او ازبکستان ولسمشرانو ویلي، دوی ته په افغانستان کې سوله او ټیکاو مهم دی
د منځنۍ اسیا هېوادونو په افغانستان کې د داعش او نورو ترهګرو ډلو د ودې باره کې بیا بیا اندېښنې ښوولي.
دغه هېوادونو بار، بار ویلي چې د افغانستان په شمالي ولایتونو کې ترهګر د ودې په حال کې دي.
خو اوس د روسیې او ازبکستان ولسمشران وايي، تر هر څه لومړی ورته په افغانستان کې ټیکاو مهم دی.
د روسیې او ازبکستان ولسمشران وایي، په افغانستان کې د سولې او ټیکاو ټینګښت تر هر څه زیات ورته لومړیتوب لري.
د دواړو ولسمشرانو ګډ خبري کنفراسن
تاس خبري اژانس د دوشنبې په ورځ لیکلي، دغه موضوع ازبکستان ته د روسیې د ولسمشر ولادیمیر پوتین سفر کې د هغه او د ازبکستان د ولسمشر شوکت میرضیایف په ګډې خبرپاڼه کې یاده شوې ده.
د روسیې او ازبکستان د ولسمشرانو په ګډې خبرپاڼه کې راغلي:« د هېوادونو مشران په افغانستان کې د سولې او امنیت ټینګښت د منځنۍ اسیا هېوادونو او ګاونډیو سیمو لپاره د سولې او ټیکاو ستر لامل بولي.»
نور ولولئ: مسکو طالبانو ته: “روسیه به د دوحې غونډه کې د طالبانو د ګډون شرطونه م.م ملتونو سره بحث کړي”
نور ولولئ: طالبان: “له مسکو سره ښې اړیکې لرو، چاته یې د خرابولو اجازه نه ورکوو”
د دغه راپور پر بنسټ، دواړه هېوادونه « غواړي خپلې هڅې د مسکو فرمټ، د شانګهای همکاریو سازمان او نورو میاکانیزمونو په اډانه کې د افغانستان د کشالې د هواري لپاره همغږي کړي.»
د ترهګرو له تور لېست د طالبانو لرې کول
د روسیې رسنیو خبر ورکړ چې مسکو د افغانستان اوسني واقعیتونو ته په کتو طالبان د ترهګرو له تور لېست څخه لرې کوي.
روسیه غواړي چې د پخوا په څېر له طالب چارواکو سره ښې اړیکې ولري او دغه ډلو د ترهګرو له تور لېست لرې کړي.
طالبانو هم د روسیې له دغه اقدام هر کلی کړی دی.
روسیه او د منځني ختیځ هېوادونو نه غواړي چې افغانستان کې له طالب پرته نورې ډلې سر راپورته کړي او د دوی امنیت وګواښي.
له همدې امله د روسیې ولسمشر ویلادیمیرپوتین ازبکستان ته سفر وکړ، د نورو مسائیلو تر څنګ کې ددغه هېواد له ولسمشر سره د افغانستان پر مسئله هم بحث کړی دی.
دواړه خواوو همدارنګه د بېلاروس، روسیې، قزاقستان، ازبکستان، افغانستان او پاکستان د ټرانسپورټي دهلیز لومړۍ غونډه مثبته وبلله.
ولادیمیر پوتین د یکشنبې په ماښام ( د غبرګولي ۶مه) ازبکستان ته ولاړ.
دا د ښاغلي پوتین د ولسمشرۍ پنځمې دورې له پیل راهیسې درېیم بهرنی سفر دی.
د هغه د ولسمشرۍ نوي پړاو لومړی او دویم سفر چین او بېلاروس ته و.
د یادونې وړ ده چې روسیه د افغانستان له خاورې تهدید ته پوره پاملرنه کوي.
