د امریکا د بهرنیو چارو وزارت وايي، پر طالبانو د فشارونو راوړل به دوام ورکوي
سپینې ماڼۍ یو ځل بیا ویلي، دوی به پر طالبانو فشار راوړلو ته دوام ورکوي تر څو چې دوی د دوحې تړون عملي کړی نه وي.
طالبانو له ښوونځیو او پوهنتونونو نجونې راګرځولي او دوی ته د زده کړو اجازه نه ورکوي. ښځو او نجونو ته د کار او زده کړو اجازه نه ورکول د امریکا په ګډون نړۍ غوصه کړې او له همدې امله د طالبانو رژیم تر اوسه په رسمیت نه دی پېژندل شوی.
د امریکا د بهرنیو چارو وزیر د سې شنبې په ورځ په واشنګټن کې د یوې ناستې پر مهال د ښځو او نجونو پر وړاندې د طالبانو کړه، وړه «له ظلمه ډک» وبلل.
فشارونو ته دوام ورکول
انټونی بلېنکن وویل: «پر طالبانو به نړۍوال فشار ته تر هغې دوام ورکوو، چې د دغې ډلې دغه ځپونکی سیاست چې ټولو افغانانو ته یې زیان اړولی ختم شوی نه وي.»
نور ولولئ: د امرالله صالح تازه مرکه: د جمهوري نظام پرځېدل د امریکا د «سي ای اې» کار و
نور ولولئ: سي ای اې وايي، روسیه د ایران په همکارۍ د ډرون الوتکو کارخانه جوړوي
نور ولولئ: د سي اېن اېن نوي موندنې؛ امریکایانو کابل هوايي ډګر کې له ځانمرګي وروسته ځینې کسان په ډزو ووژل
د امریکا د بهرنیو چارو وزیر د سې شنبې په ورځ (د چنګاښ په ۱۹مه) د «ښځو، سولې او د ناټو د امنیت» په نوم جوړې شوې ناستې ته په واشنګټن کې وویل : «موږ د مدني ټولنې او د سولې ملاتړي روزو او هغوی غښتلي کوو، چې وکولای شي په ټولنو کې د سولې او خپلواکو ټولنو په رامنځته کولو او د شخړو په پای ته رسولو کې رغنده ونډه واخلي. په تېره بیا په داسې هېوادونو کې لکه افغانستان کې چې واکمنان یې په بېرحمۍ سره د ښځو او نجونو حقونه له هغوی څخه تروړي.»
خپلې مبارزې ته دې افغان ښځې دوام ورکړي
د امریکا د بهرنیو چارو وزیر د افغان نجونو او مېرمنو پر زدهکړو او کار د لګول شویو بندیزو په اړه وویل: «ښځې او نجونې د خپلو حقونو د تر لاسه کولو او د خپل هېواد د روښانه راتلونکې لپاره خپلو مبارزو ته دوام ورکوي.»
د ټولو نړۍوالو فشارونو سره، سره طالبانو د ښځو په اړه په خپلو سیاستونو کې چې د بشري حقونو د کارپوهانو له نظره د «جنسیتي اپارتاید» ګڼل کېږي بدلون نه دی راوستی.
د طالبانو ویاند ذبیح الله مجاهد د دوحې په ۳مه ناسته کې وویل، د ښځو موضوع د افغانستان کورنۍ موضوع ده او پرېکړه هم په هېواد کې د ننه نیول کېږي.
طالبانو له دریو کلونو راهیسې د نامناسبو شرایطو نه برابرېدل په پلمه د نجونو او ښځو زده کړې ځنډولي دي.
