متقاعدین چې له دریو کلونو راهیسې له خپلو حقونو بې برخې دي، اوس به د طالبانو ځانګړي محکمې ته عریضې کوي

د طالبانو د مالیې وزارت وايي، چې د ددې ډلې د مشر هبت الله د فرمان پر بنسټ، د ټاکل شويو اصولو له مخې متقاعدینو ته د تقاعد د حقونو ورکولو پرېکړه شوې ده. طالبانو له متقاعدینو غوښتي چې د خپلو حقونو د ثابتولو لپاره ځانګړې محکمې ته عریضه وکړي.

د طالبانو تر واک لاندې مالیې وزارت نن یکشنبه «د مرغومي دویمه» د تقاعد د حقوقو په تړاو په یوه خبرپاڼه کې ویلي چې د هبت الله د فرمان پر بنسټ، د ټاکل شويو اصولو له مخې د وزارتونو او حکومتي ادارو (د کابل له نیولو څخه مخکې متقاعدینو) او د برحاله حکومتي کارکوونکو د تقاعد د حقوقو ورکولو پرېکړه شوې ده.

د هېواد سترې محکمې ته دنده سپارل کېدل

د طالبانو د مالیې وزارت په خبرپاڼه کې راغلي، چې د یاد فرمان له مخې د هېواد سترې محکمې ته دنده سپارل شوې چې له مالیې وزارت او غير بودجوي واحدونو سره په بشپړه همغږۍ د متقاعدینو د حقوقو قضیو ته د شرعي اصولو پر بنسټ رسیده ګي وکړي.

خبرپاڼه وايي، د طالبانو له بیا حاکمیت مخکې ټول متقاعدین کولای شي د خپل تقاعدي حق د ثابتولو لپاره د تقاعد د حقوقو اختصاصي محکمې ته عریضه وړاندې کړي چې غوښتنې ته به یې د محکمې له لوري د مالیې وزارت او د متقاعد شخص د اړوندې ادارې په همکارۍ د ټاکل شويو کړنلارو او شرعي اصولو له مخې رسېده ګي او اجراات ترسره شي.

نور ولولئ:  تقاعد نه ورکول له متقاعدینو سره ظلم دی

نور ولولئ: ملا هیبت الله د متقاعدینو د حقونو لپاره ځانګړې محکمې جوړوي

د طالبانو مالیې وزارت په ډاګه کړې، چې د دولتي ادارو کارکوونکو د تقاعد ونډه چې د طالبانو د بیا ځلي واک ته رسېدو وروسته د ۴۸۰۲ ګڼه حکم تر صدور پورې یې له معاشونو څخه وضع شوې ده، د اړوندو بودجوي او غیر بودجوي واحدونو له لارې د محکمې له حکم پرته اجرا کېږي.

د حقونو د ورکړې ژمنه

طالبان ژمنه کوي چې د یاد فرمان پر بنسټ، د متقاعدینو د حقوقو ورکولو پروسه به د تشکیلاتو او معاشونو کمېسیون له لوري له ټاکل شوي مهال وېش سره سمه پیل شي.

دا په داسې حال کې ده، چې د طالبانو مشر له دې وړاندې په افغانستان کې د تقاعد سیسټم لغو او د متقاعدینو معاشونه بند کړي وو.

د نوموړي ددې پرېکړې په غبرګون کې د تېر حکومت متقاعدینو د خپلو حقونو د ترلاسه کولو په موخه پراخ اعتراضونه کړي دي.

په تېر لړم میاشت کې د متقاعدو دولتي کارکوونکو یوې ډلې په کابل کې د ملګرو ملتونو د سیاسي استازولۍ (یوناما) پر وړاندې هم اعتراض وکړ.

تقاعد شوي پخواني کارکوونکي وايي، چې په ۱۴۰۰ ل کال کې واک ته د طالبانو له رسېدو وروسته دوی خپل تقاعد نه دی ترلاسه کړی.