طالب ویاند پر طالب چارواکو د امریکا بندیزونه وغندل
![the taliban ministers](https://afghannow.net/wp-content/uploads/2023/12/The-Taliban-ministers-348x196.png)
د امریکا له لوري پر دوو طالب وزیرانو تازه بندیزونه لګول شوي چې طالب ویاند دغه بندیزونه غندلي دي
طالبان وايي چې دا بندیزونه د نړیوالو قوانینو خلاف دي. دوی په داسې حال کې دا خبره کوي چې طالبانو د ښځو پر وړاندې ځپونکي تګلارې عملي کوي او د ښځو اسلامي او بشري حقوق یې تر پښو لاندې کړي دي.
طالبانو د امریکا له لوري د دې ډلې د امر بالمعروف و نهې عن المنکر پر وزیر محمد خالد حنفی او د علومو اکاډمۍ پر مشر فرید الدین محمود لګیدلي بندیزونه غندلي.
نور ولولئ: د طالبانو ښځو ضد پالیسي؛ په هلمند کې د رسنیو له لارې د ښځو پر غږ بندیز لګولی
امریکا پر دغو طالبانو د ښځو او نجونو د ځپلو له امله بندیزونه لګولي او له ۶ ټولګي د پورته زدکړو د بندیز اصلي طراحان یې بللي.
دا ډول فشارونه ستونزې نه شي هوارولی
خو د طالبانو ویاند ذبیح الله مجاهد په اکس خواله رسنۍ خپور کړي پیغام کې د امریکا د خزانه دارۍ وزارت له خوا پر دې طالب چارواکو لګیدلي بندیزونه غندلي دي.
د مجاهد په وینا فشار او بندیزونه هیڅ ستونزه نشي هوارولی او دا چې د ده په وینا امریکا د دغه دول ناکامو کړنو تجربه لري چې نورې باید تکرار نشی.
نوموړي ویلي: “په داسې حال کې چې امریکا پخپله د اسراییل د ملاتړ له امله د بشري حقونو تر ټولو ستر سرغړونکی هیواد دی، د بشري حقونو پر سرغړونو د نورو تورنول او بیا پرې بندیزونه لګول غیر منطقي کار دی.”
د نورو هېوادونو پر وګړو دا ډول بندیزونه
د متحده ایالتونو د بهرنیو چارو وزیر انتوني بلنکین د جمعې په ورځ په یوه اعلامیه کې ویلي چې د امریکا د خزانه دارۍ وزارت او بهرنیو چارو وزارت د ۱۳ هیوادونو په ۳۷ کسانو له بشري حقونو د سرغړونې له امله بندیزونه لګولي دي.
نور ولولئ: د طالبانو ښځو ضدتګلاره؛ وزیر یې وايي روغتونونو کې ښځینه ډاکټرانې کمې دي
په دې ډله کې د افغانستان، چین او ایران په ګډون د یو شمیر نورو هیوادونو چارواکي هم شامل دي.
د امریکا د خزانه دارۍ وزارت ویلي چې پر طالب چارواکو د ښځو او نجونو د ځپلو له امله بندیزونه لګیدلی او د طالبانو د امر بالمعروف او نهې عن المنکر وزرات سرپرست وزیر حنفي د انساانانو په وژنو، اختطافونو، وهلو او ټکولو کې لاس لري.
خو له دې ټولو سره سره بیا هم طالبانو د نړیوالو غوښتنو ته پام نه دی کړی او نه یې هم د نړیوال تعمل لپاره لار هواره کړي ده.
نړیوال له طالبانو غوښتي چې د رسمیت پېژندنې لپاره زمینه مساعده کړي.