د حزب الله غورځنګ وايي، د اسرائیلو په هوايي برید کې یې مهم قوماندان ابراهیم عقیل وژل شوي دی
د لبنان حزب الله غورځنګ منلې چې د اسرائیلو د پرون ورځې بریدونو کې یې یو جګپوړی قوماندان ‘ابراهیم عقیل’ وژل شوی دی.
د لبنان د پلازمینې بیروت سویلي برخه کې د اسرائیل په بریدونو کې لږترلږه ۱۴ کسان وژل شوي، چې د حزب الله څو نور قوماندانان هم پکې دي.
د پیچر چاودنو جګړیز جرم
بلخوا د ملګرو ملتونو امنیت شورا سیمه، په ځانګړې توګه لبنان کې د روان وضعیت څېړلو لپاره غونډه کړې.
د ملګرو ملتونو د بشري حقونو کمشنر ‘وولکر تورک’ دې غونډې ته ویلي، څو ورځې وړاندې لبنان کې د مخابرو چاودنې ښايي جګړه ییز جرم وبلل شي.
د لبنان حکومت او حزبالله وايي دا چاودنې چې لسګونه کسان یې ووژل او زرګونه نور یې ټپيان کړل، اسرائیلو کړې دي.
نور ولولئ: اسرائیلي پوځ: په لبنان کې مو په هوايي برید کې د حماس مهم قوماندان وژلی
نور ولولئ: پر لبنان د اسرائیلو سایبري حمله؛ د پېچرونو په چاودنه کې ۹ کسان وژل شوي
نور ولولئ: اسرائیل: “لبنان کې مو د حزب الله له ۱۰۰ زیات توغندیز سیسټمونه په نښه کړل”
د اسرائیل هوايي ځواک لخوا پرون پر دویمه پرله پسې ورځ د بیروت سویل کې په نښه شوې سیمه د حزبالله مرکز بلل کیږي.
په دغو بریدونو کې د استوګنې څو ودانۍ په نښه شوي دي.
د اسرائیلو پوځ وویل د حزبالله یو مهم قوماندان ‘ابراهیم عقیل‘ یې وژلی دی. وروسته پخپله حزبالله هم د هغه وژنه تایید کړه.
د ابراهیم عقیل وژل کېدل
د اسرائيلو د پوځ ویاند ‘دانیا هاګاري’ وویل هوايي ځواک یې د حزب الله د قوماندانانو هغه ډله یې په نښه کړې چې پر اسرائیلو د بریدونو همغږۍ لپاره راټول شوي وو.
نوموړي زیاته کړه، دغو بریدونو پر ابراهیم عقیل سربېره د ‘رضوان ځواک’ څو مهم عملیاتي قوماندانان هم وژل شوي دي.
هغه ادعا وکړه چې دغه کسان د استوګنې د یوې لوړ پوړېزې ودانۍ په تلخونه کې را ټول شوي وو.
د اسرائیلو پوځ ویلي ابراهیم عقیل د حزب الله لوی عملیاتي قوماندان او د رضوان په نوم د ځواک قوماندان وو.
د حزبالله دغه جګپوړی قوماندان داسې مهال ووژل شو چې په وروستیو ورځو کې له اسرائیلو سره پر پوله د دې ډلې بریدونه زیات شوي.
د اسرائیلو پوځ ویلي، چې پرون د دغه هېواد پر شمال له سلو ډېر توغندي توغول شوي.
حزبالله ویلي چې هدف یې د اسرائیلو استخباراتي مرکز و.
بل خوا د ملګرو ملتونو سازمان او د بشري حقونو سازمانونه وايي، د حزب الله او اسرائیلو تر منځ جګړه به په منځني ختیځ کې حالت نور هم کړکېچن کړي.
