ملګري ملتونه: د افغانستان پرمختګ د طالبانو لخوا پر ښځو د لګول شویو محدودیتونو پر لرې کولو پورې تړلي

ملګري ملتونه وايي د افغانستان رفاه د طالبانو له خوا د ښځو د زده کړو پر محدودیتونو د لرې کولو پورې تړلې ده.

د دوشنبې په ورځ، د کب ۲۷مه، د ملګرو ملتونو د امنیت شورا په یوه پرېکړه کې د دې سازمان د افغانستان د مرستندوی پلاوي (یوناما) ماموریت وغځاوه او ټینګار یې وکړ چې تر هغه وخته چې د طالبانو حکومت د نجونو او ښځو د زده کړو او کار پر بندیز پای ونه لګوي، په افغانستان کې به سوله او رفاه تامین نه شي.

په دې پرېکړه کې د امنیت شورا غړو د یوناما ماموریت د ۲۰۲۶ کال د مارچ تر ۱۷مې د ټولو رایو په اتفاق وغځاوه.

طالبانو چې له درې کلونو څخه د زیاتې مودې لپاره واک ته رسېدلي دي، نه یوازې نجونې یې له شپږم ټولګي پورته ښوونځیو ته له تلو منع کړي، بلکې د پوهنتونونو او روغتیايي علمي مرکزونو دروازې یې هم د نجونو پرمخ تړلې دي.