یونېسیف وايي، امکان لري چې نړیوال بانک له پنجشیر نه کابل ته د اوبو شبکې غځولو کې مالی همکاري وکړي

یونېسیف تېره اوونۍ ویلي وو چې تر ۲۰۳۰ میلادي کال به د کابل خلک د اوبو له نشتوالي سره مخامخ شي او په دې برخه کې به یو بحران رامنځته شي.

‏د ملګرو ملتونو له ماشونومانو ملاتړ صندوق یا یونيسف وایي، هڅه کوي چې نړېوال بانک کابل ته د پنجشېر اوبو د انتقال پروژې مالي ملاتړ ته چمتو کړي.

د طالبانو او ملاتړ کوونکو بنسټونو تر منځ د مرستې سیاست

د یو نیسیف مسئولینو د طالبانو د بهرنیو چارو وزیر مولوي امیرخان متقي سره کتنه کې ویلي، دغه سازمان چمتو دی، چې د افغانستان حکومت سره له نږدې همکاري وکړي.

بل لورته د طالبانو د بهرنیو چارو وزیر په دې کتنه کې ویلي، چې دوی نړېوالو بشردوستانه سازمانونو سره د مرستې سیاست خپل کړی او د دې سازمانونو کارکوونکو ته د امنیت ټنیګښت ته ځانګړې پاملرنه لري.

نور ولولئ: طالبان او نړیوال بانک د کاسا۱۰۰۰ پروژې د پیل په اړه هوکړې ته نږدې شوي

نور ولولئ: نړیوال بانک: افغانستان به تر ۲۰۲۵ کال له اقتصادي رکود سره مخامخ وي

د یادونې ده، چې د کابل ښار د ځمکې لاندې اوبو کمښت پلازمېنې اوسېدونکو ته لویه ستونزه ده او دا مهال د طالبانو حکومت هڅه کوي چې کابل ته د پنجشېر اوبو د انتقال لویه پروژه پلې کړي.

په ۲۰۲۳ کال کې د طالبانو د بیا حاکمیت وروسته په افغانستان کې د نړیوال بانک ګڼې پروژې نیمګړې پاتې دي.

د کابل ښاریانو خوښي

کابل ښاریان هم د دې پروژې پلي کېده د خوښۍ زیری بولي او وایي ورسره به د اوبو برخه کې د کابل ښاریانو ستونزه حل شي.

کابل ښاریان وایي، دلته د اوبو د کمښت له امله خلک له ستونزو سره مخ دي او آن په ځینو ښاري سیمو کې داسې کورنۍ شته چې د څښاک اوبو ته حیران دي.

دوی تمه لري چې د دې پروژې بشپړېدا سره به دوی د څښاک ترڅنګ په نورو لومړنیو برخو کې هم د اوبو له نعمته برخمن شي.

خو د یادې برخې کارپوهان وايي، په ښارونو او اطرافي سیمو کې د برمو، څاګانو او بوړیو په خپل سره کېندنې ددې لامل شوي چې تر ځمکې لاندې د اوبو کچه راټیټه کړي او له همدې امله د هر کال په تېرېدو تر ځمکې لاندې اوبه د ځمکې ښکته پوړ ته روانې دي.

د معلوماتو له مخې پنجشیر نه کابل ته د اوبو د لېږد پروژه به درې کاله وخت ونیسي.