نوي ډهلي او تهران ترمنځ د چابهار له بندره د ګټې اخیستو ۱۰ کلن تړون لاسلیک کړ
د هند او ایران چارواکو یو ۱۰ کلن تړون لاسلیک کړی چې پر بنسټ به یې د ایران د چابهار بندر د یوې برخې مدیریت او پراختیا نوي ډیلي ته وسپارل شي.
د رویټرز د راپور پر بنسټ، دا هوکړهلیک دوشنبه د مې پر ۱۳مه د هند د بېړۍچلونې وزیر میان ساربانادا سونووال او د ایران د سړکونو او ښارجوړونې وزیر مهرداد بذرپاش ترمنځ په تهران کې لاسلیک شوی دی.
د تړون لاسلیکېدو ګټه
د دواړو هېوادونو په ګډه اعلامیه کې راغلي: «دا ۱۰ کلن تړون د ایران او هند دوه اړخیزې اړیکې پراخوي او ورته مهال د سوداګرو او سیمهییزو سوداګریزو شرکتونو ترمنځ باور پیاوړی کوي.»
سونووال په اېکس کې د دې تړون د لاسلیکولو مراسمو د عکسونو په خپراوي سره دا د دواړو هېوادونو او د سیمې په اړیکو کې یوه «تاریخي شېبه» بللې ده.
د هند د بیړۍچلونې وزیر زیاته کړې ده: «دا تړون نه یوازې د دوو سترو هیوادونو ترمنځ اړیکې پیاوړې کوي؛ بلکې د نړۍوال اکمالاتو لړۍ او په سمندري سکټور کې د هند لپاره یو پیاوړی ګام دی.»
نور ولولئ: د هند له لوري افغانستان ته د چابهار بندر له لارې د ۲۰۰ ټنو درملو لېږد
نور ولولئ: تهران: طالبان سر له سبا له چابهار بندر کار اخیستلی شي
هغه دا تړون د هند د لومړي وزیر نریندرا مودي د سوداګریزو پلانونو یوه برخه بللې چې له مخې یې ایران، افغانستان، اوراسیا او د منځنۍ اسیا هېوادونو ته د لاسرسي لپاره یوه بدیل سوداګریزه لار پیدا کړي.
په یاد بندر کې د هند پانګونه
د خپاره شویو راپورونو پر بنسټ، هند به «۱۲۰ میلیونه ډالره د دغه بندر لپاره د ستراتیژیکو تجهیزاتو په برابرولو او له ۲۵۰ میلیونو ډالرو څخه د زیاتو ټرانسپورتي زیربناوو» په برخه کې پانګونه وکړي.
تر دې دمخه د هند د بهرنیو چارو وزیر ویلي و چې هېواد یې غواړي د چابهار بندر د مدیریت په هکله له ایران سره یوې اوږدمهالې هوکړې ته ورسېږي.
هند په داسې حال کې د ایران په سویل ختیځ سواحل کې د چابهار بندر د یوې برخې د پراختیا په حال کې دی چې د خپل سیال پاکستان د کراچۍ او ګوادر له بندره تیر شي او خپل سوداګریز توکي د چابهار له لارې ایران، د منځنۍ اسیا هېوادونو او افغانستان ته واستوي.
کله چې د طالبانو او پاکستان ترمنځ اړیکې ترینګلي شوې، اوس زیات افغان سوداګر د چابهار بندر له لارې افغانستان ته واردات کوي.
