ګوګلمن د ټرمپ په اړه؛ ښايي هغه له داعش سره د مبارزې په خاطر د طالبانو په اړه مثبت نظر ولري

د افغانستان او اسیا په چارو کې لوړپوړی امریکایی شنونکی مایکل کوګلمن وايي چې د طالبانو په اړه د امریکا منتخب ولسشمر ډونالډ ټرمپ چلند ښايي د نوموړي د کابینې له نورو غړو سره په «ټکر» کې وي.

کوګلمن دا څرګندونې یک‌شنبه د جنوري پر ۱۶مه په خپله اېکس‌پاڼه کې مطرح کړې دي.

نوموړي لوړپوري امریکايي شنونکي ادعا کړې چې ښايي ټرمپ له داعش سره د مبارزې لپاره د طالبانو په اړه مثبت نظر ولري.

د هغه په وینا، دا چلند به د ټرمپ دولت د لوړپوړو غړو ترمنځ د اختلاف لامل شي.

کوګلمن ویلي چې د ټرمپ په کابینه کې د سپینې ماڼۍ د ملي امنیت سلاکار مایک والټز د طالبانو د مخالف څېرو له ډلې دی او هغه له دې طرحې سره اختلاف لري.

نوموړي زیاته کړې چې په داسې وضعیت کې به پاکستان په افغانستان کې د ترهګرۍ له زیاتېدونکو اندېښنو څخه ګټه پورته کړي.

د کوګلمن په خبره، پاکستان کولای شي د امریکا د راتلونکي دولت لپاره ځان ګټور شریک وښيي.

دا څرګندونې په داسې حال کې کېږي چې د امریکا په نیواورلئان ښار کې تېره چهارشنبه د یو داعشي بریدګر په برید کې ۱۵ کسانو ژوند بایلود او ۳۰ نور ټپیان شول.