د ایران د بهرنیو چارو وزیر عباس عراقچي ویلي، د ایران او امریکا جګړه نه یوازې سیاسي او امنیتي پایلې لري، بلکې امریکا به یې درنه اقتصادي بیه هم پرې کړي.
عراقچي په خپلو تازه څرګندونو کې ویلي چې د امریکا د ولسمشر ډونالډ ټرمپ هغه سیاستونه چې د ایران پر ضد د فشار او پوځي تقابل لامل شوي، د امریکا پر اقتصاد مستقیم اغېز کوي او امریکايي کورنۍ به یې زیان وویني.
د ایران او امریکا جګړه د انرژۍ بازارونه اغېزمن کړي
د ایران د بهرنیو چارو وزیر ویلي، د منځني ختیځ کړکېچ او د ایران او امریکا جګړه د نړیوالو انرژۍ بازارونو بېثباتۍ ته لاره هواره کړې ده. د هغه په وینا، د تېلو بیو لوړېدل، د نړیوالو بازارونو اندېښنې او د مالي فشارونو زیاتوالی د اوسني وضعیت څرګندې نښې دي.
عراقچي ادعا کړې چې د امریکا د خزانې د اوږدمهاله سود کچې لوړې شوې او دا موضوع د پورونو، کور اخیستو او مصرفي لګښتونو پر وضعیت منفي اغېز کوي.
هغه زیاته کړې: «دا یوه اختیاري جګړه ده او امریکا به یې اقتصادي لګښتونه په خپله ورکړي.»
ټرمپ د هرمز تنګي د خلاص پاتې کېدو غوښتنه کړې
د ایران او امریکا جګړه داسې مهال د نړیوالو بحثونو په مرکز کې ده چې د امریکا ولسمشر ډونالډ ټرمپ د خپل وروستي بهرني سفر پر مهال ویلي، هرمز تنګی باید د نړیوال تجارت لپاره پرانیستی پاتې شي.
ټرمپ همداراز ټینګار کړی چې واشنګټن او بیجینګ د ایران د اټومي پروګرام او سیمهییز وضعیت په اړه ګډې اندېښنې لري.
سیاسي او اقتصادي شنونکي وایي، که د ایران او امریکا جګړه نوره هم پراخه شي، نو دا به یوازې د سیمې امنیت نه، بلکې نړیوال اقتصاد، د تېلو بازارونه او سوداګریز مسیرونه هم اغېزمن کړي.
