په ټولنیزو رسنیو کې د طالبانو تبلیغاتي ډلې د کرېکټ پر لوبغاړو نیوکې کړي دي
د طالبانو دغه ډله په ټولنیزو رسنیو کې لیکي چې د کرېکټ لوبغاړي دې خپل کرېکټ کوي، ددوی د نجونو پر مکتبونو او پوهنتونونو څه کار دی.
وروسته له هغه چې د طالبانو مشر ملا هبت الله اخوندزاده د دوشنبې په ورځ په رسمي توګه په طبي انسټیټوټونو کې د نجونو زده کړې منع کړې، د کرېکټ د ځینو لوبغاړو په ګډون په براخه توګه پر دغې پریکړې نیوکې وشوې. اوس طالب تبلیفاتي ډلو د کرېکت ځینو لوبغاړو باندې نیوکې پیل کړي.
لوبغاړو ته د سپکاوي پوسټونه
په دغو تبلیغاتو کې ځینو طالب پلوو پر اېکس د دغو کرېکټ لوبغاړو ځیني شخصي انځورونه خپاره کړي او توهین کوونکي کلمات یې ورسره کارولي دي.
د طالبانو د تبلیغاتي ډلې یو کس پر اېکس په توهیني ډول لیکلي، چې اوس دوی موږ ته د قران او حدیث تشریحات راکوي او اخطار یې ورکړی چې له دې کارونو لاس واخلي کنه سبا به بیا ژاړي.
بل طالب لیکلي: «کرېکټران دې د کرېکټ په چوکاټ کې ووسي، کنه نو د کرېکټ د بستر د ټولولو انتظار دې وباسي.»
نور ولولئ: له هر ډول زده کړو د نجونو راګرځولو ته غبرګونونه
نور ولولئ: د کرېکټ یو شمېر لوبغاړي: د نجونو پر مخ د زده کړو مرکزونو بندېدل د توجیې وړ نه دي
نور ولولئ: ملا هیبت الله ته ملا ضعیف؛ هلته به پوه شې چې دې عقل سر ته راشي
د افغانستان د کرېکټ پیاوړي لوبغاړي او لوبډلمشر راشد خان پرون د چارشنبې په ورځ پر خپله فېسبوک پاڼه ليکلي و، چې د نجونو پر مخ د تعليم او طبي څانګو د تړل کېدو خبرونو خواشینی او مایوسه کړی دی.
افغان مخکښه کرېکټ لوبغاړي محمد نبي پرون پر خپله فېسبوک پاڼه لیکلي و، چې د نجونو پر مخ د طبي زده کړو د مرکزونو تړل د ټول هېواد او ملت په زيان دي. نوموړي ویلي و: «دا پرېکړه یوازې ددې نجونو راتلونکي ته زیان نه رسوي، بلکې ټول هېواد او ملت ته یې تاوان رسېږي.»
محمد نبي د طالبانو دغه پرېکړه بې انصافي بللې او غوښتنه يې کړې، چې طالب چارواکي دې پر دې پرېکړه جدي غور وکړي.
یو بل طالب مبلغ
د طالبانو د تبلیغاتي ډلې بل غړي د راشد خان او محمد نبي د عکسونو پر خپرولو سره لیکلي: «عجیبه زمانه شوه مولویان، مفتیان او شیخان بر ځای ناست دي، د احادیثو تشریحات د وخت د فحاش خلکو څخه اورو.»
د کرېکټ ځوان او پیژندل شوی لوبغاړي رحمان الله ګربز پر خپلې فېسبوک پاڼې پرون د قران یو ایت او حدیث چې پر زده کړې ټېنګار کوي له پښتو ژباړې سره خپاره کړي وو.
ګربز د ایت او حدیث ترجمه په دې توګه لیکلې وه: «اې بنده ولوله د خپل هغه رب په نوم چې تاسو یې پیدا کړي یاست.
تعليم پر ټولو مسلمانانو (نر او ښځې )فرض دی.»
دې ته ورته د طالبانو د تبلیغاتي ډلې له خوا پر کرېکټ لوبغاړو ډېرې نیوکې شوي چې وايي، دوی دې خپل کرېکټ کوي او نورو مسایلو کې دې لاسوهنه نه کوي.
دا په داسې حال کې ده چې د طالبانو امیر ملا هیبت الله اخوندزاده د نجونو پر مخ د طبي زده کړو دراوزې هم د یو فرمان په خپرولو سره وتړلې.
