عباس عراقچي وايي، د ایران وسلهوال ځواکونه دفاع ته بشپړ چمتو دي، خو تهران له منځګړو سره د اووهورځني پلان د عملي کولو لپاره ډیپلوماټیکو هڅو ته دوام ورکوي.
د ایران د بهرنیو چارو وزیر ویلي چې هېواد یې د احتمالي پوځي ګواښونو پر وړاندې دفاع ته چمتو دی، خو لا هم غواړي د ډیپلوماسۍ له لارې د امریکا او ایران ترمنځ د کړکېچ د هواري لپاره هڅې روانې وساتي.
عباس عراقچي د چهارشنبې په ورځ، د اکتوبر په ۲۸مه، پر خپله اېکسپاڼه په یوه پیغام کې ټینګار کړی چې تهران له منځګړو سره پرلهپسې اړیکې لري.
نوموړي ویلي، د ایران وسلهوال ځواکونه د هېواد دفاع ته بشپړ چمتو دي، خو حکومت یې لا هم ډیپلوماسۍ ته د بریالیتوب فرصت ورکوي.
د هغه په وینا، له منځګړو سره د داسې وړاندیزونو په اړه خبرې روانې دي چې د تهران اووهورځنی پلان ښايي تر ټاکلې مودې په لږ وخت کې عملي کړي.
عباس عراقچي د اووهورځني پلان په اړه څه وايي؟
د ایران د بهرنیو چارو وزیر ویلي چې تهران غواړي له امریکا سره د اختلافاتو د هواري لپاره د منځګړو له لارې د خبرو امکان ژوندی وساتي.
د راپورونو له مخې، ایران دغه اووهورځنی پلان د سپټمبر په میاشت کې د قطر د منځګړیتوب له لارې واشنګټن ته وړاندې کړی و. عباس عراقچي
په وړاندیز کې د جګړې د درولو، د هرمز تنګي د بیا پرانیستلو او د دواړو هېوادونو ترمنځ د خبرو د بیا پیل لپاره یو لړ ګامونه شامل دي.
تهران غواړي امریکا د ایران پر بندرونو سمندري محدودیتونه لرې کړي، د تېلو د صادراتو پر وړاندې بندیزونه نرم کړي او د کنګل شویو شتمنیو د خوشې کولو په اړه اقدامات وکړي.
د ایران د وړاندیز له مخې، د دغو شرطونو له پوره کېدو وروسته به د هرمز تنګي د عادي سوداګریز تګ راتګ د بیا پیل او د پراخو مذاکراتو لپاره زمینه برابره شي.
خو تر اوسه د دغه پلان پر ټولو شرطونو د تهران او واشنګټن د موافقې خبر نه دی ورکړل شوی.
د منځګړو هڅې او د نوې جګړې اندېښنې
د نړیوالو رسنیو د راپورونو له مخې، قطر او یو شمېر نور سیمهییز هېوادونه هڅه کوي چې د ایران او امریکا ترمنځ د خبرو بهیر بیا پیاوړی کړي.
رویټرز د اکتوبر په ۲۸مه راپور ورکړی چې قطري منځګړو تهران ته د احتمالي هوکړې یوه نوې طرحه وړاندې کړې، خو یوه لوړپوړي ایراني چارواکي ځینې وړاندیزونه د منلو وړ نه دي بللي.
د دواړو لورو ترمنځ یوه مهمه اختلافي موضوع د ګامونو ترتیب دی. واشنګټن غواړي د ایران اټومي پروګرام د خبرو له پیل سره مطرح شي، خو تهران د بندیزونو او سمندري محدودیتونو د لرې کولو غوښتنه کوي.
د دغو اختلافاتو له امله لا څرګنده نه ده چې روانې ډیپلوماټیکې هڅې به کله یوې عملي هوکړې ته ورسېږي.
عباس عراقچي په خپلو وروستیو څرګندونو کې د پوځي چمتووالي ترڅنګ پر ډیپلوماسۍ ټینګار کړی، خو د خبرو پایله به د دواړو هېوادونو ترمنځ د اختلافاتو په حل پورې تړلې وي.
