د امریکا هوا پېژندنې ملي ادارې د کالیفورنیا شاوخوا ۴۰ میلیونه اوسېدونکو ته خبرداری ورکړی چې ښايي کورونه او ژوند یې له جدي خطر سره مخ شي
د امریکا په لوېدیځ کې کالیفورنیا ایالت ته به په راتلونکو دوو ورځو کې یو ځل بیا د ژمي سړه څپه ورسېږي چې اټکل شوی خطرناک توپانونه به ورسره مله وي.
د درنې واورې ورښت او بارانونه چې تېز بادونو به ورسره مل وي په سمندر غاړو کې د سېلابونو راوتلو اټکل خطرناک حد ته لوړ کړی دی. له همدې امله د جمعې په ورځ د مارچ په ۱۰مه د کالیفورنیا نژدې ۴۰ میلیون اوسېدونکو ته د احتمالي طبعي افتونو خبرداری ورکړل شوی دی.
د توپانونو نوې څپې په کالیفورنیا کې د هوا پېژندنې ټول ریکارډونه مات کړي چې په ځینو سیمو کې یې تر دوه مترو ډېره واوره شوې او د دې ایالت ډېری وچ غرونه یې اوس پر واورو پوښتلي دي.
د سختو ورښتونو له امله د سیلابونو راوتلو اټکل هم شوی دی
د امریکا د هوا پېژندنې ملي ادارې خبرداری ورکړی چې په کالیفورنیا کې د جمعې له ورځې پیل شوي سخت بارانونه ښايي د شنبې او یا یکشنبې تر ورځې دوام وکړي او په ډېرو سیمو کې به د سیلابونو راوتلو سبب شي.
د دغې ادارې په اعلامیه کې راغلي: “ژوند او کورونه له جدي خطر سره مخ دي. هغه سیمې چې په عادي وختونو کې سېلاب پکې نه راځي، باید د اونۍ په اوږدو کې د سېلابونو او اوبو راوتلو په تمه اوسي.”
نور ولولئ: امريکا کې د توپاني له امله تر ۱۰۰ د ډېرو وګړو مړینه وېره ښکاره شوی
د سختو بارانونو او سېلابونو د وړاندوینې ترڅنګ، د ځمکې او غرونو د ښویېدو او په سیندونو کې د خټو راوتلو په اړه هم اندېښنې زیاتې شوې دي.
د کالیفورنیا د مرکز شمالي برخې د بیګ سور اوسېدونکو ته د ارام سمندر په یوه ډبرینه او غرنۍ سیمه کې خبرداری ورکړل شوی چې لږ تر لږه د دوو اونیو لپاره خواړه او نور د اړتیا وړ توکي زېرمه کړي.
په ځینو سیمو کې د شاوخوا نیم متر ورښت اټکل شوی چې کولای شي د سترو سېلابونو او د ځمکې ښوېدنې لامل شي.
د کالیفورنیا والي ګیوین نیوزم بېړنی حالت اعلان کړی او ولسمشر جو بایډن هم د یوه فرمان په صادرولو سره د کالیفورنیا حکومت ته د فدرالي بودجې کارولو اجازه ورکړې ده.
