د هندوستان غوره ليګ (IPL) سياليو په لړ کې تېره شپه ګجرات لوبډلې پنجاب لوبډلې ته ماتې ورکړه
د هندوستان غوره ليګ (IPL) سياليو په پرونۍ لوبه کې ګجرات ټايټنس لوبډلې د لوبې په وروستي اور کې پنجاب کينګز لوبډلې ته له يوې جالبې لوبې وروسته ماتې ورکړه
د آی پي اېل د تېرې لوبې پچه ګجرات ټايټنس لوبډلې لوبډلمشر هارډک پانډيا وګټله او د توپ اچونې پرېکړه يې وکړه.
پنجاب کينګز لوبډله د توپ وهنې لپاره ميدان ته راغله، د نوموړې لوبډلې له لوري مټ شارټ، جېټش شرما او شارو خان ښه توپ وهنه وکړه. مټ شارټ په ۲۴ توپونو ۳۶ منډې، جېټش شرما په ۲۳ توپونو ۲۵ منډې او شارو خان بيا په ۹ توپونو ۲۲ منډې ترلاسه کړې.
د ګجرات ټايټنس لوبډلې له لوري په توپ اچونه کې موهيټ شرما، راشيد خان او جوش لېټل ښه ولوبېدل. موهيټ شرما په ۴ اورونو کې ۱۸ منډې ورکړې او دوه لوبغاړي يې وسوزول، راشد خان په ۴ اورونو کې ۲۶ منډې ورکړې او يوه ویکټ يې ترلاسه کړه او جوش لېټل په ۴ اورونو کې ۳۱ منډې ورکړې او ده هم يو لوبغاړی له ډګره بهر کړ.
د پنجاب کينګز لوبډلې د پوره شلو اورونو په لوبولو سره د ۸ ویکټو په زيان ۱۵۳ منډې وکړې او خپلې سیالې لوبډلې ته يې د ۱۵۴ منډو هدف وټاکه.
د ګجرات ټايټنس لوبډله د ټاکلي هدف پوره کولو په موخه ميدان ته راښکته شوه
د ګجرات ټايټنس لوبډلې له لوري په توپ وهنه کې شبمن ګيل، ورېډيمن سها او سای سډرسن تر نورو ښه لوبه وکړه. شبمن ګيل په ۴۹ توپونو ۶۷ منډې، ورېډيمن سها په ۱۹ توپونو ۳۰ منډې او سای سډرسن په ۲۰ توپونو ۱۹ منډې جوړې کړې.
د پنجاب کيګنز لوبډلې له لوري په توپ اچونه کې هارپريټ برار، سم کرون او ارشډيف سينګ ښه توپ اچونه وکړه. برار په ۴ اورنو کې ۲۰ منډې ورکړې او يو لوبغاړی يې وسوزولو، کرون په ۳٫۵ اورونو کې ۲۵ منډې ورکړې او يوه ویکټ يې ترلاسه کړه او ارشډيف سينګ په ۴ اورونو کې ۳۳ منډې ورکړه او ده هم يو لوبغاړی له ډګره بهر کړ.
نور ولولئ: د هندوستان غوره ليګ سياليو په لړ کې راجستان لوبډلې چينای لوبډلې ته ماتې ورکړه
د ګجرات ټايټنس لوبډلې د لوبې په وروستي اور کې هدف تر لاسه او لوبه يې په خپل نوم کړه.
د لوبې غوره لوبغاړی موهېټ شرما وټاکل شو چې ښه توپ اچونه يې وکړه.
د نن لوبی له حاله هم خبر شئ
نن ورځ يوه لوبه ترسره کيږي چې کلکته نایټ رايډرز د سنرايزرس حيدرآباد لوبډلې سره لوبه کوي.
