فرانسه کې د ناکراریو او اړدوړ ویره په زیاتېدو ده او همدې د کنترول لپاره کې حکومت تدابیر نیولي
په فرانسه کې د نورو ناکراریو رامنځته کېدو له اندېښنې وروسته اضافي پولیس ځای پر ځای شوي دي.
د کورنیو چارو وزیر ګیرالد درمانین وايي، د جمعې ورځې تر مازدیګر پورې ۴۵ زره پولیس په بېلا، بېلو سیمو کې ځای پر ځای شوي دي.
په فرانسه کې دا ناکرارۍ د سې شنبې پر ورځ له هغه وروسته پیل شوې، چې الجزایری الاصله ۱۷ کلن زلمی چې د نائل ایم په نامه یاد شوی، د پولیسو په ډزو ووژل شو.
د نیول شوو کسانو شمېر
بل لور د فرانسې کورنیو چارو وزیر وايي، د پنجشنبې پر شپه د نیول شویو کسانو له اضافه کېدو وروسته د ټولو نیول شویو کسانو شمېر ۹۱۷ تنو ته رسېږي، چې تر ۱۳ کلنو پورې ماشومان هم پکې شامل دي.
نور ولولئ: د راسموس پالودان د قرآن سوځولو پر ضد لاریونونه روان دي
چارواکي پرلپسې له خلکو غوښتنه کوي، چې خپل ماشومان باید په اړودوړ کې له برخې اخیستو راوګرځوي. حکومت دغه راز د شپې مهاله ټرام او بس سروس درولو غوښتنه هم کړې او چارواکي وايي، له امنیتي ځواکونو سره به د نظم په رامنځته کولو کې د مرستې لپاره زغروال ګاډي وکارول شي.
بلواګرو ګڼ شمېر ګاډو ته اور ورته کړی او دکانونه یې لوټ کړي دي.
د موسیقۍ د کنسرتونو لغوه کېدل
په فرانسه کې د موسیقۍ کنسرتونه چې له مخکې پلان شوي وو، لغو شوي، پاریس میټرو چې د اونۍ پای کې د معمول له وخته یو ساعت ناوخته بندیږي، نن به د عادي ورځو په څېر غیر فعاله شي.
په ځینو سیمو کې د شپې له لسو د ګهیځ تر پنځو بجو پورې لګول شوی ګرځبندیز لا هم پر ځای دی او د کاروبارونو څښتنانو ته ویل شوي چې په همدې وختونو خپل دکانونه او هټۍ وتړي.
د یادونې ده، چې تېرو څو شپو کې د ځینو سیمو مشهور کاروباري مرکزونه او دکانونه هم بلواګرو لوټ کړي دي.
چارواکو اوس د اورلوبو پر توکو، پټرولو بوشکو او نورو اور اخیستونکو توکو پېر او پلور هم له هغه وروسته ممنوع کړی، چې د اړودوړ پر مهال بلواګرو د اور اچولو لپاره له دې توکو کار اخیست. شنونکي وايي، که چېرته دا بلواګر کنترول نه کړل شي، کېدای شي فرانسه کې نور مالي زیانونه هم واړوي. دوی به د لویو کاروبارونو پر وړاندې لا زیات خنډونه ایجاد کړي.
