راتلونکې میاشت کې افغان کرکټ ملي لوبډله له څو هېوادونو سره د کرکټ لوبې لري
د افغانستان کرېکټ ملي لوبډلې لپاره د روان ۲۰۲۴ کال راتلونکې فبروري مياشت ډېره بوخته ده. دې مياشت کې افغانستان له سري لنکاسره ټولې اووه سيالۍ لري چې د فبروري پر دویمه نېټه پيلېږي او تر ۲۱ به دوام وکړي. همدارنګه له ايرلنډ سره هم يوه ټېسټ لوبه ترسره کوي.
د افغانستان کرېکټ بورډ د معلوماتو له مخې له سري لنکاسره لومړنۍ سيالي ټېسټ لوبه ده چې د فبرورۍ مياشتې پر دويمه نېټه د دغه هېواد په کوربتوب په پلازمېنه کولمبو کې ترسره کېږي.
یو ورځینۍ او وروسته شل اوریزې لوبې
له دې وروسته د دريو يو ورځنيو لوبو لړۍ د فبروۍ پر نهمه پيلېږي چې تر ۱۴ نېټې به دوام وکړي. ټاکل شوې دغه يو ورځنۍ لوبې د کېنېډي په پالکلي لوبغالي کې ترسره شي.
نور ولولئ: کرکټ؛ د اماراتو پر وړاندې د رحمن الله ګربر جادوګره لوبه
نور ولولئ: کرکټ؛ نن افغان لوبډله له متحده عربي اماراتو سره د ۲۰اوریز لوبو سریز پیلوي
نور ولولئ: د افغانستان کرکټ بورډ له دریو لوبغاړو مرکزي قرارداد اخیستی دی
د يو ورځنيو لوبو له پای ته رسېدو سره د دريو شل اوريزو لوبو لړۍ پيلېږي چې لومړنۍ يې د فبروۍ پر ۱۷، دويمه پر ۱۹ او وروستۍ هغه د فبرورۍ پر ۲۱ په ډمبولا کې پلان شوې دي.
د افغانستان کرېکټ بورډ په وينا له سري لنکاسره د سياليو د مالي ملاتړ حقوق سوپر کولا او اتصالاتو مخابراتي شرکت ترلاسه کړي دي.
له سري لنکاسره د سياليو له بشپړېدو وروسته د فبرورۍ پر ۲۷ مه افغان ملي لوبډله په خپل کوربتوب په متحده عرب اماراتو کې له ايرلنډ سره ټېسټ لوبه پیلوي.
د افغانستان او ايرلنډ تر منځ دری يو ورځنۍ او دری شل اوريزې لوبې د مارچ په مياشت کې ترسره کېږي.
افغانستان تېره مياشت له هند سره دری شل اوريزې سيالۍ لرلې چې دری واړه هند وګټلې.
د افغانستان کرېکټ بورډ وايي، له بېلابېلو هېوادونو سره د دغو لوبو چمتو کول او د تمريناتي کمپونو جوړول د شل اوريز نړيوال جام د چمتوالي لپاره دي.
ټاکل شوې د کرېکټ شل اوريز نړيوال جام د روان کال د جون پر لومړۍ نېټه د امریکا او وېسټ انډيز په کوربتوب پيل شي.
د لوبډلو ګروپ بندي
د دغه نړیوال جام لپاره لوبډلې په څلورو ګروپونو وېشل شوې، چې هره ګروپ کې پنځه – پنځه لوبډلې دي.
الف ډله: هند، پاکستان. ایرلنډ، کاناډا، امریکا
ب ډله: انګلنډ، اسټرالیا، نمبیبا، سکاټلنډ، عمان
ج ډله: افغانستان، نیوزیلنډ، وېسټ انډيز، یوګانډا، پاپووا نيو ګيني
د ډله: سویلي افریقا، شري لنکا، بنګله دېش، نیدرلنډز، نیپال
د اعلان شوي مهالوېش له مخې، افغانستان د جون پر درېیمه له یوګانډا، د جون په اوومه له نیوزیلنډ، د جون په ۱۳مه له پاپووا نيو ګيني، د جون په ۱۷مه له کوربه وېسټ انډیز سره لوبې ولري.
د یادونې وړ ده چې په ۲۰۲۳ کال کې افغان لوبډلو د غوره لوبو له امله د نړیوالو پام ځان ته اړولی دی.
