طالب ویاند وايي، څوک د اختر په خوشالۍ کې هوايي ډزې نه شي کولی
طالبانو د اختر په شپه پر هوايي ډزو بندیز لګولی او وايي چې څوک دا حق نه لري چې د هوايي ډزو له امله عامه نظم اخلال کړي.
شیبه مخکې طالبانو ملکي او نظامي کسانو ته خبرداری ورکړی، چې د اختر به خوشالۍ کې بايد هوايي ډزې ونه کړي.
د دې ډلې وياند ذبیح الله مجاهد ويلي، چې که چا سرغړونه وکړه، قانوني چلند به ورسره وکړي.
پر هوايي ډزو بندیز لګېدلی
د طالبانو ویاند ذبیح الله مجاهد نن پر خپله اېکس پاڼه ليکلي، د امينتي او تصفيوي کميسيون د لارښوونو له مخي، د اختر د خوشالۍ په مناسبت پر هوايي ډزو بنديز دی او له ټولو یې غوښتي، چې د مخنيوي لپاره باید تدابير ونيول شي.
هغه وايي، چې هوايي ډزز د خلګو د خپګان، ازار او مرګ ژوبلي لامل ګرځي.
نور ولولئ: طالبانو د امنیت شورا د څارونکې کمېټې راپور ته غبرګون وښود
نور ولولئ: ملا یعقوب: زموږ هوايي حریم لا هم اشغال دی
مجاهد زياتوي: « هوايي ډزې یو ناسم عمل دی، د خلکو د ازار او اذیت او کله د ټپي کیدو او قتل سبب ګرځي.»
نوموړي ټينګار کوي، چې له سرغړونکو سره به قانوني چلند وکړي.
د طالبانو امیر هم په دې اړه خبر ورکړی
د طالبانو مشر هبت الله اخونزاده هم د کوچني اختر د مبارکۍ په پیغام کې له ملکي او نظامی کسانو غوښتي، چې د خوشالي په مناسبت هوايي ډزي او د پټاکيو له استعمال ډډه وکړي. د ده په خبره، چې دا د خلګو د ازار لامل ګرځي.
دغه بندیز داسې مهال اعلانېږي چې له دې وړاندې د خوښيو په ورځو کې طالبانو هوايي ډزې کړي وې او د سړیو مرمیو له امله ځینو هېوادوالو ته مرګ ژوبله اوښتي وه.
