د طالبانو تر کنټرول لاندې کار او ټولنیز چارو وزارت ۳۰ زره ښځو ته د کار جوازونه ورکړي دي
د یاد وزارت د ویاند په خبره، دغه ښځې دمګړۍ په دولتي او خصوصي ادارو کې په بېلابېلو برخو کې کار کوي.
د کار او ټولنیزو چارو وزارت وايي، تېر کال یې نږدې ۳۰ زره ښځو ته د فعالیت جوازونه ورکړي دي.
د یاد وزارت د ویاند په خبره، دغه ښځې دمګړۍ په دولتي او خصوصي ادارو کې په بېلابېلو برخو کې کار کوي.
له اړتیا سره سم د جوازونه وېشل
د کار او ټولنیزو چارو وزارت ویاند، سمیع الله ابراهیمي وویل: « ښځو ته د کار جوازونه په هغو سکتورونو کې ویشل شوي چې ورته اړتیا لیدل کیږي او کولی شي نورو میرمنو ته خدمات وړاندې کړي.»
رویا په پلازمېنه کې د خیاطۍ د یوه کارغالي مسووله ده، او وایي دغه کارغالی یې د هغو ښځو د ملاتړ په موخه جوړ کړی چې د خپلو کورنیو مشري کوي.
نور ولولئ: معترضې مېرمنې، رینا امیري د طالبانو لابيګره بولي
نور ولولئ: رینا امیري وايي، په نادولتي ادارو کې د ښځو پر کار بندیز ستونزې رامنځته کړې
رویا وایي: « دا کارغالی مې په خپله شخصي بودیجه جوړ کړی او ۳۰ ښځې مو په کار ګمارلي دي. که حکومت همکاري وکړي، ښايي د دغو مېرمنو شمېر له ۱۰۰ تر ۱۵۰ پورې ورسېږي.»
د کورني اقتصاد پیاوړي کول
پنځلس کلنه روبینا چې کابل ښار کې د خیاطۍ په یوه کارغالي کې کار کوي، وايي د اقتصادي ستونزو له امله دلته کار کوي.
هغه له طالبانو غواړي چې په هېواد کې د ښځو لپاره لا ډېرې اسانتیاوې برابرې کړي.
روبینا وویل: « زه له شپږو میاشتو راهیسې دلته کار کوم او له چاپېریاله ډیره خوښه یم. زه کار کوم ځکه چې وکولای شم د خپلې کورنۍ ملاتړ وکړم.»
ورته مهال، د سوداګرۍ او پانګونې خونه بیا په بېلابېلو برخو کې د ښځو فعالیت د کورنۍ د اقتصاد د ودې او د ګټورو کاري فرصتونو د برابرېدو په برخه کې ګټور بولي او په هېواد کې د ښځینه متشبثینو پر ملاتړ ټینګار کوي.
د سوداګرۍ او پانګونې خونې د مدیره پلاوي غړي، خانجان الکوزي وویل: « ښځو ته باید فرصتونه برابر شي، دوی باید د افغانستان په اقتصاد، تولید او سوداګرۍ کې برخه واخلي. دوی د ټولنې یوه لویه برخه ده.»
ښځو ته داسې مهال دغه جوازونه ورکول کېږي چې طالبانو د ښځو او نجونو پر مخ اکاډمیک او د زده کړو مرکزونه تړلي دي او نجونو ته د زده کړو کولو اجازه نه ورکوي.
