نصیر احمد فایق وايي، ځینې ډلې دغه ستونزې ته سیاسي رنګ ورکوي، خو دا تخنیکي ستونزه ده
په ملګرو ملتونو کې د افغانستان د نمایندګۍ سرپرست نصیر احمد فایق ویلي، چې په دغه نړیوال سازمان کې د افغانستان د رایې د حق ځنډولو پرېکړه تخنیکي او غیر سیاسي ستونزه ده.
هغه په تازه څرګندونو کې ویلي، چې د دې ستونزې د ژر حلیدو په هیله دي.
په ملګرو ملتونو کې د ګډون حق
د فایق په وینا، په ملګرو ملتونو کې د داخلي طرزالعمل له مخې که یو هېواد په مسلسله توګه دوه کاله د خپل غړیتوب ګډون ونډه ورنه کړي، د رایې حق یې ځنډول کیږي او بیا د دلایلو له روښانولو وروسته یې بېرته حق ورکول کېدای شي.
دا په داسې حال کې ده، چې مخکې د سویس یوه بانک ته د افغانستان د کنګل شوې بانکي زېرمې د درې نیم میلیارد ډالري امانت صندوق یوه افغان مسوول انور الحق احدي له دغو پیسو څخه په نړیوالو سازمانونو کې د افغانستان د ګډون ونډې د ورکولو خبر ورکړی و.
نور ولولئ: د م.م امنیت شورا نن د افغانستان د وضعیت په اړه غونډه کوي
نور ولولئ: د م.م امنیت شورا د افغانستان لپاره د غونډې په ترڅ کې نوی استازی ټاکي
هغه د فایق څرګندونو ته غبرګون نه دی ښودلی.
د ملګروملتو له لوري له خپور شوي لیست سره سم، په تېرو دوو کلونو کې شپږ هیوادونو د ملګروملتو د غړیتوب فیس یا حق نه دی ورکړی. په دغو شپږ هیوادونو کې افغانستان، کومور، ایکوادور، سایوتومې او پرنسیپ، سومالیا او وینزویلا شامل دي.
کومور، ایکوادور او سومالیا د فیس د نه ادا کولو لپاره دلایل وړاندې کړي او له دې لیسته ایستل شوي دي خو له افغانستان، ایکوادور او وینزویلا سره د دلایلو او د قانع کوونکو توضیحاتو د نه وړاندې کولو په خاطر د رایې حق واخیستل شو.
په ملګرو ملتونو کې د افغانستان د چوکۍ لانجه
دا په داسې حال کې ده چې په ملګروملتو کې د افغانستان استازی د واکمن رژیم استازیتوب نه کوي او اوسنی استازی له کابل سره اړیکې نه لري.
په تېرو درو کلونو کې، چې طالبان واک ته رسیدلي، په ملګروملتو کې د افغانستان چوکۍ لانجمنه ده.
طالبانو په ځلونو په ملګروملتو کې د افغانستان د چوکۍ د ورسپارلو غوښتنه کړې او سهیل شاهین یې دې چوکۍ ته نومولی دی خو د دې لپاره چې د طالبانو حکومت نه ملګري ملتونه او نه کوم هیواد په رسمیت پېژتي، د افغانستان چوکۍ لا هم د پخواني حکومت له لوري د ټاکل شوي استازي په لاس کې ده.
افغانستان د نلګروملتو له جوړېدو یو کال وروسته په ۱۹۴۶ م کال کې د ملګروملتو غړیتوب ترلاسه کړ. د ملګروملتو سازمان د ۱۹۴۵ د اکتوبر په ۲۴ مه تاسیس شوی دی.
