د سراج الدین حقاني له سفر وروسته، امریکا له غړو هېوادونو وغوښتل چې د م.م اصول په پام کې ونیسي
د امریکا د بهرنیو چارو وزارت ویاند مټیو مېلر په یوه خبري کنفرانس کې د ملګرو ملتونو له غړو هېوادونو وغوښتل، چې د طالبانو پر سفرونو دې لګېدلي بندیزونه په پام کې وساتي.
مېلر وویل، حکومتونه دې د هغو طالب چارواکو د سفرونو په اړه چې د ملګرو ملتونو په تور نوملړ کې دي، جواز تر لاسه کړي او د دغه بهیر درناوی دې وکړي.
طالبان د بندیزونو په نوملړ کې
ښاغلي مېلر وویل: «د ملګرو ملتونو هغه غړي هېوادونه چې د ملګرو ملتونو د بندیزونو په نوملړ کې د شاملو طالبانو کوربهتوب کوي، په کار ده چې د هغوی د سفرونو لپاره اجازه تر لاسه کړي.»
هغه زیاته کړه: «دغه جواز باید د معافیت د هغه بهیر له مخې چې د ملګرو ملتونو د بندیزونو په ۱۹۸۸ پرېکړه لیک کې ځانګړی شوی، تر لاسه کړي او اړینه ده چې غړي هېوادونه دغه بهیر له پامه و نه غورځوي.»
نور ولولئ: د امریکا بهرنیو چارو وزیر له افغانستانه د امریکايي ځواکونو د وتلو پرېکړه سمه وبلل
نور ولولئ: میتو میلر: افغانستان زموږ تر څار لاندې دی، د القاعده مشر وژنه یې ښه ثبوت دی
د طالبانو د کورنیو چارو وزیر د سهشنبې په ورځ (د غبرګولي په ۱۵مه) په یو رسمي سفر ابوظبي ته لاړ او د اماراتو له لوړپوړو چارواکو له هغې ډلې یې د متحده اماراتو د دولت له رییس سره په ابوظبي کې ولیدل.
نوموړي داسې مهال دغه سفر کړی، چې امریکا په ترهګریزو بریدونو کې د لاس لرلو په تور د حقاني پر نیولو ۱۰ مېلیونه ډالر جایزه منلې.
دغه جایزه لا هم د امریکا د عدلیې وزارت په ویب پاڼه کې په خپل حال پاتې ده.
له خلیفه سراج الدین حقاني د اماراتو هرکلی
طالبانو ویلي، چې د اماراتو او د طالبانو تر واک لاندې افغانستان تر منځ د اړیکو لا پیاوړتیا، د کورنیو چارو په وزارت کې د ټرافیکو ډیجیټالي کېدل، د افغانانو لپاره د وېزو په ورکړه کې اسانتیاوې هغه برخې وې چې اماراتو د طالبانو له کورنیو چارو د وزیر سره پرې هوکړې وکړې.
له حقاني څخه د متحده اماراتو د دولت د رییس په کچه هرکلی د دې ښکارندويي کوي، چې د طالبانو دغه با نفوذه څېره هغه هېواد ته ډېر ارزښت لري.
امریکا داسې مهال دغه غبرګون ښيي چې نور یې په سیمه کې نفوذ په کمېدو دی.
طالبانو تل د امریکا دا ډول څرګندونو ته په غبرګون کې ویلي چې طالبان خپلواک او د چا فرمایشاتو ته غاړه نه شي ایښودلی.
