شنبه‌های ارغواني غورځنګ ملګري ملتونه طالبانو ته په باج ورکولو او په افغانستان کې په سیاسي دلالۍ تورن کړل

دغه غورځنګ وايي، ملګري ملتونه هڅه کوي چې له نړیوالو سره د طالبانو د تعامل تر عنوان لاندې دغه ډلې ته رسمیت ورکړي.

د دوحې په ۳مه غونډه کې چې د ملګرو ملتونو تر مشرۍ لاندې جوړه شوي وه، له افغانستانه یوازې طالبانو ګډون وکړ چې نورو مدني ټولنو او د ښځو حضور ته اجازه ورنه کړل شوه.

د دوحې په ناسته کې د ملګرو ملتونو رول

شنبه‌های ارغواني غورځنګ وایي، طالبانو دا ثابته کړه چې نه بدلېدونکي او له خپل دریځه نه په شا کېدونکي دي؛ خو ملګرو ملتونو د دوحې په ناسته کې دا ثابته کړه، چې دغې ډلې ته باج ورکوي او د دغې ډلې واک کې ساتلو ته دوام ورکوي او د تعامل په نامه یې په رسمیت پېژندلو ته زمینه برابروي.

دغه غورځنګ د یوۍ خبرپاڼې په خپرولو سره له ملګرو ملتونو پوښتنه کړې، چې پر کوم بنسټ او حق طالبانو ته فرصت برابروئ؟

نور ولولئ: راتلونکې اوونۍ په کابل کې د سیمه‌ییزو هېوادونو غونډه

نور ولولئ: ملګري ملتونه: د دوحې ۳مه ناسته به د افغان ښځو حقونه څرګند کړي

نور ولولئ: هیدر بار: ملګري ملتونه طالبان د دوحې غونډې ته په زاریو غواړي، خو د مېرمنو ونډه له پامه غورځوي

دوی وایي، ایا پوهېږئ چې د دغو فرصتونو بیه د افغانستان خلک او په ځانکړې توګه ښځې، زیان منونکي قومونه او مذهبي لږکۍ پرې کوي؟

دوی له ملګرو ملتونو غوښتي، چې په افغانستان کې دې د یوناما دروازه وتړي او په هېواد کې دې د ترهګرو، طالبانو او سیاسي دلالۍ لاس واخلي.

د افغانستان خلک باید قرباني نه شي

دوی وایي، د افغانستان خلک حاضر نه دي چې چاته حق او اجازه ورکړي چې د ملګرو ملتونو او د ترهګرو ملاتړ کوونکي هېوادونو د ګټو قرباني شي.

دوی وایي په دې پوهیږي، چې د زبرځواکونو هېوادونو په فرمایش ملګري ملتونه د تعامل په نامه د طالبانو د حکومت په رسمیت پېژندلو ته زمینه برابروي، چې دا د افغانستان د خلکو او په ځانګړې توګه د افغان ښځو په ګټه نه دی.

دوی له قطره هم غوښتي، چې نور دې د افغانستان په چارو کې لاسوهنه نه کوي او د طالبانو له ملاتړه دې لاس واخلي.

قطر، پاکستان او روسیه له هغه راهیسې د طالبانو ملاتړ کوي چې دوی د افغانستان د پرځېدلي اسلامي جمهوریت پر وړاندې جنګېدل.

خو شنبه‌های ارغواني غورځنګ او نور بنسټونه له دغه هېوادونو غواړي چې نور د طالبانو له ملاتړ لاس واخلي.

د یادونې وړ ده چې طالبان د دوحې ۳مه ناسته د خپل رژیم لپاره خورا ګټوره بولي.