د روسیې ولسمشر ویلادیمیر پوتین طالبان د تروریزم په ځپلو کې د مسکو متحدین بللي دي
ښاغلي پوتین ویلي، چې د طالبانو رژیم د ترهګرو په ځپلو کې له روسیې سره همکاري کوي او د مسکو کلک متحدین دي.
نوموړي د شانګهای د همکاریو سازمان له سرمشریزې وروسته طالبان له ترهګرۍ سره د مبارزې په برخه کې د مسکو د متحدینو په توګه یاد کړل.
ولادیمیر پوتین وویل، په افغانستان کې واک د طالبانو په لاس کې دی او له همدې امله، دوی «د تروریزم پر وړاندې مبارزه کې زموږ کلک متحدین دي.»
د تروریزم په ځپلو کې د طالبانو اقدامات
پوتین د خپل خبري کنفرانس په ترڅ کې د خبریالانو د پوښتنو په ځواب کې وویل، چې هېواد یې له طالبانو سره په اړیکه کې دی او له دغې ډلې څخه یې د ترهګرۍ پر وړاندې د مبارزې نښې ترلاسه کړې دي.
هغه د طالبانو حکومت په رسمیت پېژندلو او د شانګهای د همکاریو په سازمان کې د دې ډلې د غړیتوب په اړه وویل، چې ««دا دواړه مسایل «د حالاتو په پرمختګ پورې اړه لري.»
نور ولولئ: روسیه ملګرو ملتونو ته؛ موږ پر طالبانو لګول شوي بندیزونه لرې کوو
نور ولولئ: کابلوف: نړۍ دې حقیقت ته رسېږي چې طالبان د افغانستان قانوني مسئول دي
نور ولولئ: امیرخان متقي له مسکو مننه کړي چې دوی ته په نړیوالو ناستو کې کمپاین کوي
ولادیمیر پوتین وویل: «ما مخکې هم ویلي وو، چې له طالبانو سره په تماس کې یوو. د شانګهای د همکارۍ په سازمان کې د بشپړ غړیتوب په اړه، روسیه په یوازې ځان پریکړه نه ګوي.»
هغه زیاته کړه: “موږ باید د اصلي سیاسي جوړښتونو سره چې په هېواد کې واک کنټرولوي اړیکې وساتو.»
له شنګهای سره د ملګرو ملتونو ژمنې
همدا راز، د ملګرو ملتونو سرمنشي د شانګهای د همکارۍ سازمان په سرمشریزه کې وویل، چې ملګري ملتونه چمتو دي چې په ټوله نړۍ کې له ترهګرۍ سره د مبارزې په برخه کې د شانګهای د همکارۍ له سازمان سره مرسته وکړي.
انتونیو ګوترش وویل، د هېوادونو لپاره دا مهمه ده چې د دې مخه دې ونیسي چې افغانستان د «ترهګرۍ په ځاله» بدل شي.
د شانګهای د همکارۍ سازمان سرمشریزه د چهارشنبې په ورځ (چنګاښ ۱۳مه) «د څو اړخیزو خبرو اترو پیاوړتیا – د سولې او دوامدار پرمختګ لپاره هڅې» تر شعار لاندې د دوو ورځو لپاره پیل شوه.
په دې ناسته کې د روسیې، قزاقستان، هند، ایران، چین، قرغزستان، پاکستان، تاجکستان، ازبکستان، بلاروس، منګولیا، اذربایجان، قطر، متحده عربي اماراتو، ترکیې او ترکمنستان هېوادونو مشرانو او استازو ګډون کړی.
هاخوا بیا د پاکستان لومړي وزیر شهباز شریف تاجکستان ته په سفر سره دواړه هېوادونو په افغانستان کې د ټول شموله حکومت د رامنځته کولو په هکله خپل ګډ دریځ اعلان کړی دی.
