یوازې په صدیانا زندان کې له ۲۰۱۱ بیا تر ۲۰۱۸ د اسد رژیم لخوا ۳۰ زره کسان اعدام شوي دي
سوري او لبناني وګړي د اسد د رژیم ړنګېدو سره په پټو بندخونو کې د خپلو عزیزانو په لټه کې دي. لا هم زیات کسان له کورنیو لا درکه دي.
د سوریې د مخکیني ولسمشر بشار الاسد د رژیم له ړنګېدو سره یو شمېر سوري او ان لبناني وګړي په پټو بندخونو کې د خپلو عزیزانو په لټه کې دي. په سوریه کې حاکمو ډلو د پټو بندخونو او بندیانو د خوشې کېدو په اړه پلټنې پیل کړي دي.
په دې پټو بند خونو کې څومره کسان بندیان دي؟
یو شمېر رسنیو په ترکیه کې مېشت د تري تم شویو بندیانو د ټولنې د شمېرو په حواله لیکلي، چې په دغو پټو بندخونو کې څه باندې ۱۰۰۰ تنه سوري او لبناني وګړي بندیان دي.
د الجزیرې د راپور له مخې، د بشار الاسد د رژیم تر ټولو لویه بندخونه صیدنایا بندخونه وه، چې د دمشق د شمال په دیرش کیلومترۍ کې پرته ده.
نور ولولئ: ابو محمد جولاني څوک دی او پر وړاندې یې ننګونې څه دي؟
نور ولولئ: ۴۰ کاله ورک شوی لبنانی د سوریې په زندان کې و
په سوریه کې حاکمو ډلو تر هغه وروسته د پټو بندخونو د موندلو هڅې پیل کړي، چې د اسد د رژیم له نسکورېدو سره د بندیان د وږې پاتې کیدو په اړه اندیښمن وو.
که څه هم ویل کېږي، چې یو شمېر کورنۍ د خپلو عزیزانو د ژوندي پاتې کېدو تمه نه لري، خو بیا هم هڅه کوي په دې اړه معلومات ترلاسه کړي.
په صدیانا زندان کې د ښځو بندیانېدل
په سوریه کې د وروستیو پرمختګونو یوه ویډیو ښیي، چې یاغیان د سوریې له مشهور صیدنایا زندان څخه لسګونه ښځې خوشې کوي.
صیدنایا زندان د سوریې تر ټولو بدنامه زندان دی، چې د بښنې نړۍوال سازمان د څېړنو له مخې په کې ډله ییز اعدامونه او شکنجه کول عام وو.
ویل کېږي، چې په دغه بندخونه کې د اسد د رژیم د مخالفانو سلګونه پلویان شکنجه او اعدامېدل.
د روانې اونۍ د شنبې په ورځ تحریر شام ډلې اعلان وکړ، چې د حمص ښار له نیولو سره یې څه باندې ۳۵۰۰ بندیان د دې ښار له نظامي بندخونې څخه خوشې کړل.
د یو شمېر راپورونو له مخې، له ۲۰۱۱ تر ۲۰۱۸ کلونو پورې د سوریې په زندانونو کې څه باندې دیرش زره بندیان یا اعدام شوي او یا د شکنجو او د روغتیایي خدمتونو د نه شتون له امله مړه شوي دي.
