اړوند خبرونه:
عباس عراقچي: د افغان کډوالو د ستنېدو بهير به تدريجي وي
علیرضا بیګدلي: ایران کې افغان کډوال د دې هېواد په اقتصادي پرمختګ کې مهم رول لري
ملګري ملتونه: تېرو ۲ورځو کې نږدې ۹زره افغان کډوال له پاکستانه ایستل شوي
د امریکایي رسنۍ نیوزویک د ایمیلونو او ځايي سرچینو په حواله راپور ورکړی چې د ډونالډ ټرمپ حکومت هغو افغان کډوالو ته چې د ۲۰۲۱ کال د طالبانو د واکمنۍ وروسته په قانوني توګه متحده ایالاتو ته داخل شوي وو، امر کړی چې په یوه اوونۍ کې امریکا پرېږدي، که نه نو د نیولو او قانوني تعقیب سره به مخ شي.
دغه خبرتیاوې چې د ټرمپ د پراخې مهاجرت ضد پالیسۍ یوه برخه ګڼل کېږي، هغو افغان اتباعو ته منسوب دي چې د «بشردوستانه موقت اقامت» یا نورو قانوني لارو له لارې امریکا ته داخل شوي وو. ډېری دغه کسان د امریکا له حکومت سره د همکارۍ یا د مذهبي او قومي ځورونو څخه د تېښتې له امله افغانستان پرېښی و.
د راپور له مخې، د امریکا د کورني امنیت وزارت د «بشردوستانه موقت اقامت پای ته رسېدو خبرتیاوې» استوي، چې په کې له ترلاسه کوونکو غوښتنه شوې چې په یوه اوونۍ کې په خپله خوښه د امریکا خاوره پرېږدي؛ که نه نو د نیولو او قانوني پروسو سره به مخ شي. د دې وزارت چارواکو ویلي چې دا اقدام هغو کسانو ته شاملېږي چې نور په امریکا کې د پاتې کېدو قانوني وضعیت نه لري.
د نیوزویک د راپور له مخې، یو شمېر افغان کډوالو په رالي، د شمالي کارولینا ایالت کې، دغه ایمیلونه ترلاسه کړي دي. یو افغان پناه غوښتونکي چې د «ورال» سیمهییزې شبکې سره یې خبرې کړې او نه یې غوښتل نوم یې څرګند شي، ویلي: «که موږ افغانستان ته ستانه شو، په امن کې به نه یو؛ دا د ځان وژنې ماموریت لاسلیک کول دي.»
په راپور کې راغلي چې د ټرمپ حکومت د افغان اتباعو لپاره د موقت ملاتړ وضعیت د لغوه کولو لپاره هم ګامونه اخلي. دا وضعیت چې د افغان اتباعو د اخراج مخه یې نیولې وه او هغوی ته یې د قانوني کار اجازه ورکړې وه، ټاکل شوې چې د مې په ۲۰مه پای ته ورسېږي او د ټرمپ حکومت ویلي چې د دې د تمدید اراده نه لري.
