اړوند خبر:
د پاکستان د بهرنیو چارو وزیر سبا شنبه افغانستان ته سفر کوي
د ایران د بهرنیو چارو وزیر سید عباس عراقچي او اسحاق ډار د افغانستان د حالاتو په اړه خبرې اترې کړي دي.
د افغانستان پر وضعیت د سیمهییزو او ګاونډیو هېوادونو د بحثونو په دوام، د ایران د بهرنیو چارو وزیر، سیدعباس عراقچي د پاکستان د بهرنیو چارو له وزیر او د صدراعظم له مرستیال، اسحاق ډار سره ټلفوني خبرې کړې دي.
د ایران د بهرنیو چارو وزارت په خبرپاڼه کې ویل شوي چې دا تلفوني خبرې تېر ماښام شوې او دواړو لوریو د افغانستان، سیمې او د خپلو دوهاړخیزو اړیکو په اړه نظرونه تبادله کړي دي.
د خبرپاڼې له مخې چې په دې تلفوني خبرو کې د ایران د بهرنیو چارو وزیر له خپل پاکستاني سیال سره د ایران او پاکستان ترمنځ د اړیکو پر پیاوړتیا هم بحث کړی او همداراز پخپلو کې د افغانستان پر وضعیت هم غږېدلي دي.
تر اوسه دا نه ده روښانه چې دغو ایراني او پاکستاني چارواکو به د افغانستان په اړه څه ویلي وي، خو تر دې مخکې هم بار بار د ایران او پاکستان لوړ رتبه چارواکو د افغانستان پر وضعیت بحثونه کړي وو.
د ایران د بهرنیو چارو وزارت دا هم ویلي چې عباس عراقچي او اسحاق ډار د ایران او امریکا ترمنځ د غیرمستقیمو خبرو پیلېدو ته هم اشاره کړې او په دې برخه کې د وروستیو تحولاتو په اړه غږېدلي دي.
