اړوند خبرونه:
د طالبانو رژیم: داعش خراسان اوس د پاکستان له بلوچستان او خیبرپښتونخوا فعالیت کوي
د طالبانو او پاکستان ترمنځ د اړیکو ترینګلتیا؛ پاکستان د ملایانو بله ډله کابل ته استولي
په داسې حال کې چې د تحریک طالبان پاکستان (TTP) لهخوا د پاکستان پر خاوره د بریدونو د زیاتوالي له امله د اسلامآباد-کابل اړیکې ترینګلې شوې، طالبانو بالاخره د دغه ډلې ضد اقدامات پیل کړي دي. د پاکستان معتبرې ورځپاڼې اکسپریس ټریبیون د یوه لوړپوړي پاکستاني چارواکي له قوله لیکلي، چې دا لومړی ځل دی چې طالبان د هغو عناصرو پر ضد عمل کوي چې د TTP په ګټه فعالیت کوي.
سرچینو ویلي، طالبانو د مارچ میاشتې په دریمه اونۍ کې، د پاکستان د ځانګړي استازي محمد صادق خان او د طالبانو د بهرنیو چارو وزیر امیرخان متقي ترمنځ له غونډې وروسته، شاوخوا ۷۰ کسان نیولي دي. دا کسان، چې ډېری یې افغان وګړي دي، تورن دي چې د کشمیر په پیښه کې له برید وروسته یې غوښتل پاکستان ته ننوځي. دا اقدامات داسې مهال کېږي چې اسلامآباد له طالبانو څخه د “نه زغم” تګلاره غوښتې ده.
پاکستاني امنیتي چارواکي وایي، له دې اقداماتو وروسته د خیبرپښتونخوا په ګډون د قبایلي سیمو د ځانمرګو بریدونو کچه “په ښکاره ډول” کمه شوې ده. دا یوه مهمه لاسته راوړنه ګڼل کېږي چې ښایي د دواړو خواوو ترمنځ اړیکې بېرته رغېدونکي کړي.
یو پاکستانی چارواکی چې نوم یې نهدی افشا شوی، ویلي: “دا یو مثبت تحول دی، خو موږ د طالبانو لهخوا د بېرته نه راګرځېدونکو اقداماتو هیله لرو.” اسلامآباد وایي، د طالبانو ژمنې باید یوازې د فشار د کمولو لپاره نه وي، بلکې دوامداره عملي ګامونه هم ورسره وي.
په مقابل کې پاکستان ژمنه کړې چې افغان سوداګرو ته به اسانتیاوې برابرې کړي. د وروستیو پرمختګونو لهمخې، پاکستان د افغانستان پر وارداتي سوداګرو د بانکي ضمانت شرط لېرې کړی، او یو شمېر ترانزیټي محدودیتونه یې هم نرم کړي دي.
سرچینې وایي، چین د دې تازه اړیکو د رغونې تر شا مهم رول لوبولی. دا هېواد، چې هممهاله له طالبانو، هم له پاکستان او هم د CPEC پروژې له لارې د اقتصادي ثبات علاقه لري، دواړو خواوو ته مشوره ورکړې چې اختلافات له سولهییزې لارې حل کړي.
کارپوهان وایي، که طالبان د TTP پر ضد اقدام ته دوام ورکړي، دا به یوازې د پاکستان لهپاره نه، بلکې د ټولې سیمې امنیت ته ګټه ورسوي. افغانستان، چې د نړیوالې ټولنې له زیات فشار سره مخ دی، کولای شي له دې لارې د خپل رسمیت پېژندنې لپاره یو مهم ګام واخلي.
