اړوند خبرونه:
د طالبانو بهرنیو چارو وزارت: “له چین سره مو په دوه اړخیزو اړیکو خبرې وکړې”
المرصاد: اسلام اباد د خپلو ګټو په خاطر چین د سیمې نیابتي جګړو ته راکاږي
د روسیې ولسمشر ولادیمیر پوتین د افغانستان سره د دوه اړخیزو اړیکو د پراخولو لپاره د روسیې د ملي امنیت شورا پلاوی کابل ته لېږلی، چې دا چاره د دواړو هېوادونو ترمنځ د تعامل یو مهم پرمختګ بلل کېږي.
د روسیې د ملي امنیت شورا منشي، سرګي شویګو، دا موضوع د پنجشنبې په ورځ د مسکو د امنیتي ناستې په پای کې اعلان کړه. نوموړي وویل: «په دې وروستیو کې، د ولسمشر پوتین په لارښوونه د امنیت شورا یو پلاوی کابل ته واستول شو، څو له طالبانو سره د راتلونکو همکاریو پر میکانېزمونو خبرې وشي.»
شویګو څرګنده کړه چې د روسي پلاوي او د طالبانو د حکومت د استازو ترمنځ په لیدنو کې د ترانسپورتي دهلېزونو جوړولو، د کانونو د ګډې سپړنې، سوداګریزو تبادلو پراخولو او کرنیزو همکاریو په برخو کې بحث شوی دی.
په ورته وخت کې، د روسیې د دفاع د مدیریت مرکز د جوزا له ۶مې تر ۸مې د سیمې د امنیت پر سر یوه نړیواله ناسته جوړه کړه چې پکې د طالبانو یو لوړپوړی پلاوی هم، په بېساري ډول، برخهوال و. دا د طالبانو لپاره یو مهم ډيپلوماټیک پرمختګ بلل کېږي، ځکه روسیه تر اوسه طالبانو ته رسمي مشروعیت نه دی ورکړی.
روسیه په تېرو میاشتو کې د افغانستان لپاره د یو شمېر ستراتیژیکو پروژو، لکه د ترانس افغان دهلېز، د بریښنا د انتقال او د کانونو د استخراج په برخو کې د پانګونې لیوالتیا ښودلې ده. همداراز، طالبانو هم د روسي شرکتونو او پانګوالو لپاره اسانتیاوې برابرې کړې دي.
سیاسي شنونکي باور لري چې د افغانستان جیوپولیتیک موقعیت او بډایه زیرمې، مسکو ته مهم دي او دا نوې اړیکې به دواړو لورو ته اقتصادي او ستراتیژیکې ګټې ورسوي.
د سیمې د امنیتي معادلو په بدلېدونکي چاپېریال کې، دا لیدنې کولای شي افغانستان د نړیوالې انزوا د ماتولو لاره هواره کړي.
