اړوند خبر:
د افغانستان لومړۍ صادراتي محموله د خواف-هرات د اوسپنې پټلۍ له لارې اروپا ته ولېږدول شوه
د افغانستان د اوسپنې پټلۍ شبکه په چټکۍ سره د پراخېدو په حال کې ده، چې دغه هېواد اوسمهال په مستقیم او غیر مستقیم ډول د سیمې له اوو مهمو هېوادونو سره نښلوي. دا پرمختګ د افغانستان لپاره د سوداګرۍ او ترانزیټ په برخه کې نوي فرصتونه رامنځته کړي دي.
په مستقیمو اړیکو کې، افغانستان د حیرتان بندر له لارې له ازبکستان سره، د اقینې او تورغونډۍ بندرونو له لارې له ترکمنستان سره او د خواف-هرات پټلۍ له لارې له ایران سره وصل دی. د حیرتان-مزارشریف کرښه د منځنۍ اسیا بازارونو ته د لاسرسي لپاره یوه حیاتي دروازه ده. همدارنګه، د اقینې او تورغونډۍ لارې له ترکمنستان سره سوداګریزې اړیکې پیاوړې کوي او د خواف-هرات پروژه، چې کارونه یې په چټکۍ روان دي، افغانستان د ایران له لارې نړیوالو اوبو ته نږدې کوي.
سربېره پر دې، افغانستان په غیر مستقیم ډول له چین، قزاقستان، روسیې او ترکیې سره هم د ریل له لارې نښلول شوی دی. د ازبکستان او ترکمنستان له شبکو څخه په ګټې اخیستنې، افغان سوداګر کولی شي خپل مالونه چین، قزاقستان او روسیې ته ورسوي. د ایران د ریل پټلۍ له لارې بیا ترکیې او اروپا ته د صادراتو او وارداتو زمینه برابره شوې ده، چې دا د افغانستان لپاره یو ستراتیژیک پرمختګ ګڼل کېږي.
د دغو پټلیو له لارې هره ورځ تر لس زره مټریک ټنه او په میاشت کې تر درې سوه زره مټریک ټنه ډېر توکي واردیږي او صادریږي. د اسلامي امارت اقتصادي رهبري د اوسپنې پټلۍ پراختیا ته ځانګړې پاملرنه کوي او هڅه کوي چې په دې برخه کې د کورنیو او بهرنیو پانګوالو پام راجلب کړي، ترڅو افغانستان د سیمې په یو مهم ترانزیټي مرکز بدل شي.
