په کندهار کې بیارغونه په چټکۍ سره روانه ده؛ تازه د ۱.۸ میلیارده افغانیو په ارزښت د یوه ۸ کیلومتره اوږد سړک د جوړولو چارې پیل شوې چې سلګونو کسانو ته به پکې کاري زمینه برابره شي.
د کندهار ولایت سیمه ییزو مسوولینو په دغه ښار کې د ۱.۸ میلیارده افغانیو په لګښت د یوې مهمې پراختیایي پروژې د پیل کېدو خبر ورکړی دی. په دغه پروژه کې د ۸ کیلومتره په اوږدوالي او ۸۰ متره په پلنوالي د یوه اساسي سړک جوړول شامل دي، چې د ښار په ترافیکي او اقتصادي وضعیت کې به مثبت بدلون راولي.
په کندهار کې بیارغونه د ښاروالۍ لومړیتوب
د یادې پروژې د پرانیستې په مراسمو کې د کندهار ښاروال مولوي عبدالله روحاني وویل، چې په کندهار کې بیارغونه د دوی له بنسټیزو موخو څخه ده. هغه زیاته کړه چې د دغه سړک په جوړېدو سره به نه یوازې ښار پراختیا ومومي، بلکې د ترافیکو ستونزې به کمې او ښاریانو ته به ګڼې اسانتیاوې برابرې شي.
د کندهار ښاروالۍ ویاند سیفالله عاصم رسنیو ته وویل، چې دغه لویه پروژه د ښاروالۍ له انکشافي بودیجې څخه تمویلېږي او ټولې چارې به یې په معیاري او اساسي ډول پر مخ لاړې شي.
په کندهار کې بیارغونه، د پروژې جزیات او کاري فرصتونه
د مسوولینو په وینا، د دغې پروژې لومړی پړاو د کندهار ښار د «امارت» له څلورلارې څخه تر «نساجي پله» پورې د ۲.۵ کیلومتره په اوږدوالي پلي کېږي. د دغه پړاو لګښت ۱۱۵ میلیونه افغانۍ اټکل شوی چې په راتلونکو اتو میاشتو کې به بشپړ شي. د دې برخې په پیل کېدو سره شاوخوا ۲۰۰ کسانو ته په فني او غیر فني برخو کې د کار زمینه برابره شوې ده.
د یادونې وړ ده چې په کندهار کې بیارغونه یوازې په دې پروژه محدوده نه ده؛ د ښاروالۍ چارواکي وایي چې د دې پروژې دوهم پړاو به هم ډېر ژر پیل شي او تمه ده چې د راتلونکي کال تر پایه به یې ټولې چارې بشپړې او ګټې اخیستنې ته وسپارل شي.
د داسې بنسټیزو پروژو پلي کول ښیي چې په کندهار کې بیارغونه په سم لوري روانه ده او د ښار د عصري کولو لپاره جدي ګامونه اخیستل کېږي.
