د افغانستان ښځینه کرکټ ملي لوبډله د نړیوال رسمیت لپاره انګلستان ته ځي؛ لوبغاړې د ICC له پرېکړې هیله لري
د افغانستان ښځینه کرکټ ملي لوبډله له نږدې پنځو کلونو وروسته د نړیوال رسمیت د ترلاسه کولو او د ښځینه ورزشکارانو د حقونو د ملاتړ لپاره انګلستان ته سفر کوي. دا سفر یوازې د کرکټ سیالیو پورې محدود نه دی، بلکې د کرکټ نړیوالې شورا (ICC) له لوري د رسمي پېژندنې د غوښتنې یو مهم ګام هم ګڼل کېږي.
د بریتانیايي رسنیو د راپورونو له مخې، د افغانستان ښځینه لوبډله به د جون او جولای میاشتو د شل اوریز نړیوال جام پر مهال په انګلستان کې سیالۍ ترسره کړي، خو د نړیوال جام د رسمي سیالیو برخه به نه وي.
له کابله تر کانبرا؛ د لوبغاړو د مبارزې نوې مرحله
په ۲۰۲۱ کال کې، کله چې طالبان بیا واک ته ورسېدل، د افغانستان ښځینه کرکټ ملي لوبډلې ډېری غړې د امنیتي اندېښنو له امله له هېواده ووتلې او په بېلابېلو هېوادونو کې مېشتې شوې.
د اسټرالیا په پلازمېنه کانبرا کې مېشته لوبغاړې بنفشه هاشمي وایي، د دوی اساسي غوښتنه نړیوال رسمیت دی.
هغې ویلي:
«موږ د رسمیت پېژندنې غوښتنه کوو. د کرکټ نړیوالې شورا تل ویلي چې ښځې او نارینه برابر حقونه لري. که موږ په رسمیت وپېژندل شو، دا به د افغانستان دننه د هغو نجونو لپاره یوه لویه هیله وي چې لا هم د سپورټ له حقه محرومې دي.»
ولې د افغانستان ښځینه کرکټ ملي لوبډله رسمیت نه لري؟
د طالبانو تر واک لاندې د افغانستان کرکټ بورډ د ښځو کرکټ رسمي نه دی منلی، او همدې موضوع د کرکټ نړیوالې شورا لپاره هم د رسمیت پېژندنې او رسمي سیالیو ته د شاملولو خنډ رامنځته کړی دی.
له ۲۰۲۱ کال راهیسې پر ښځو د زدهکړو، کار او سپورټ په ګډون ګڼ محدودیتونه لګول شوي، هغه وضعیت چې نړیوالو بشري حقونو سازمانونو د “جنسیتي اپارتاید” په نوم یاد کړی دی.
د ICC لپاره تاریخي فرصت
د لوبډلې مدیره ایما سټېپلز وایي، د انګلستان سفر په قصدي ډول د ښځو د نړیوال جام او په سکاټلنډ کې د کرکټ نړیوالې شورا له کلنۍ غونډې سره هممهاله تنظیم شوی دی.
د هغې په وینا:
«د کرکټ نړیواله شورا اوس یو تاریخي فرصت لري چې سیاست یوې خوا ته کړي او پر دغو ځوانو ښځو پانګونه وکړي.»
د کډوالو لوبډلې په توګه د رسمیت وړاندیز
د راپورونو له مخې، یو وړاندیز دا هم دی چې د افغانستان ښځینه کرکټ ملي لوبډله د کډوالو د یوې ځانګړې لوبډلې په توګه رسمیت ومومي؛ لکه څنګه چې یو شمېر بېوطنه ورزشکاران د المپیک نړیوالې کمېټې تر بیرغ لاندې سیالۍ کوي.
د کرکټ نړیوالې شورا مالي ملاتړ
دغه لوبډلې خپله لومړۍ ګډه لوبه د ۲۰۲۵ کال په جنورۍ کې د اسټرالیا د ملبورن په ښار کې ترسره کړه، چې نړیوال پام یې ځان ته واړاوه.
وروسته ICC د “افغانستان د ښځو د کرکټ نوښت” په نوم یو ځانګړی پروګرام اعلان کړ چې له لارې یې لوبغاړو ته مالي ملاتړ او مسلکي روزنه برابره شوه.
د انګلستان اوسنی سفر هم د همدې پروګرام په مالي ملاتړ ترسره کېږي.
د پروګرام راتلونکی لا هم نامعلوم دی
ټاکل شوې ده چې د دغه پروګرام مالي ملاتړ د روان کال په اګست میاشت کې پای ته ورسېږي او راتلونکی یې د جولای په میاشت کې د ICC په کلنۍ غونډه کې وڅېړل شي. د افغانستان ښځینه کرکټ ملي لوبډله
د اسټرالیا کرکټ بورډ ویلي چې د افغان ښځینه لوبغاړو ملاتړ ته ژمن دی او په ICC کې به د هغوی لپاره د لا ډېرو روزنیزو او سیالیزو فرصتونو د برابرولو هڅې روانې وساتي.
«زه به د کرکټ لپاره له طالبانو اجازه وانخلم»
په کاناډا کې مېشته لوبغاړې رویا صمیم وایي، د کابل د پرېښودو ورځ یې لا هم له یاده نه ده وتلې. د افغانستان ښځینه کرکټ ملي لوبډله
هغې ویلي:
«په هغه ورځ چې موږ له کابله وتښتېدو، ټاکل شوې وه یوه لوبه ولرو. داسې احساس مې کاوه لکه هر څه مې له لاسه ورکړي وي.»
صمیم زیاتوي چې ځینو لوبغاړو د وتلو پر مهال د کرکټ خپل وسایل وسوځول یا یې پټ کړل، ځکه وېره یې لرله چې د طالبانو له لوري به په نښه شي. د افغانستان ښځینه کرکټ ملي لوبډله
هغې د افغانستان ښځینه کرکټ ملي لوبډله د هغو نجونو استازې وبلله چې په افغانستان کې د زدهکړو او سپورټ له حقونو بېبرخې دي او په پای کې یې ټینګار وکړ:
«زه به د کرکټ کولو لپاره له طالبانو هېڅکله اجازه وانخلم.»
دا سفر د افغان ښځینه لوبغاړو لپاره یوازې یوه ورزشي سیالي نه، بلکې د نړیوال رسمیت، مساوي فرصتونو او د هغو نجونو د غږ رسولو هڅه ده چې لا هم په خپل هېواد کې د سپورټ او زدهکړو له اساسي حقونو محرومې دي. د افغانستان ښځینه کرکټ ملي لوبډله
