ایران کې تازه بریدونه؛ سنتکام د نویو هوايي عملیاتو د پیل خبر ورکړ
ایران کې تازه بریدونه د امریکا د مرکزي قوماندانۍ (سنتکام) له اعلان وروسته نوي پړاو ته داخل شوي دي. سنتکام ویلي چې د ایران پر ځینو هدفونو یې د شپنیو بریدونو نوی لړ پیل کړی، په داسې حال کې چې په سیمه کې امنیتي وضعیت لا هم ترینګلی دی.
سنتکام د ایران پر هدفونو د بریدونو نوی پړاو اعلان کړ
د امریکا مرکزي قوماندانۍ (سنتکام) په خپله اېکسپاڼه کې په خپره شوې اعلامیه کې ویلي چې د چهارشنبې په شپه د ایران پر وخت د شپې په ۱۱:۳۰ بجو یې د ایران پر ټاکلو هدفونو نوي هوايي بریدونه پیل کړي دي. ایران کې تازه بریدونه
د سنتکام په وینا، د دغو عملیاتو موخه د ایران هغه پوځي وړتیا کمول دي چې د سیمې د سوداګریزو او ملکي بېړیو لپاره ګواښ ګڼل کېږي.
ایران کې تازه بریدونه؛ کویت د ایراني ډرونونو د مخنیوي خبر ورکړ
د کویت پوځ ویلي چې د ایران د بېپیلوټه الوتکو (ډرونونو) د یوې نوې څپې د بریدونو د مخنیوي عملیات روان دي.
تر اوسه د احتمالي مرګژوبلې یا مالي زیان په اړه رسمي معلومات نه دي خپاره شوي.
حوثیانو پر دوو تېل وړونکو بېړیو د برید ادعا وکړه
د بریتانیا د سمندري سوداګرۍ د عملیاتو ادارې (UKMTO) ویلي چې د پنجشنبې په لومړیو ساعتونو کې یې د سعودي عربستان د جازان سیمې د جنوب لوېدیځ په شاوخوا ۱۳۰ کیلومترۍ کې د یوې سمندري پېښې راپور ترلاسه کړی دی.
د ادارې په وینا، د یوې تېل وړونکې بېړۍ کپتان راپور ورکړی چې یوه ناپېژندل شوې مرمۍ پر بېړۍ لګېدلې، اور یې بل کړی او عمله یې د اور د مهارولو هڅه کوي.
له دې وروسته، د ایران له ملاتړ څخه برخمنو حوثیانو ادعا وکړه چې د «انسېلا» او «لیلیا» په نوم دوې تېل وړونکې بېړۍ یې په نښه کړې دي.
حوثیانو ویلي، دغو بېړیو د دوی له لوري اعلان شوې سمندري محاصره نقض کړې وه. تر اوسه د دغې ادعا خپلواکه تایید نه دی شوی.
ایران کې تازه بریدونه؛ په اهواز او سیرک کې د چاودنو راپورونه
د ایران مهر خبري اژانس د خوزستان ولایت د چارواکو له قوله راپور ورکړی چې اهواز ته نږدې پر یوې سیمې د امریکا توغندي لګېدلي دي.
په ورته وخت کې، د ایران انګلیسي ژبې دولتي ټلوېزیون «پرس ټيوي» هم د هرمزګان ولایت د سیرک په سیمه کې د څو چاودنو خبر ورکړی دی.
خو تر اوسه د امریکا مرکزي قوماندانۍ (سنتکام) د دغو راپورونو په اړه رسمي څرګندونې نه دي کړې.
ایران کې تازه بریدونه د سیمې امنیتي وضعیت لا پسې حساس کړی دی. د امریکا د نویو هوايي عملیاتو، د کویت د دفاعي اقداماتو، د حوثیانو د بریدونو ادعاوو او په ایران کې د چاودنو راپورونو د کړکېچ د پراخېدو په اړه اندېښنې زیاتې کړې دي. د ځینو وروستیو ادعاوو خپلواکه تایید لا هم نه دی شوی او تمه ده چې په راتلونکو ساعتونو کې به نور رسمي معلومات هم خپاره شي.
