پاکستان د کړنګ پر غاړه؟ د کورنیو چارو وزیر: اوسنی نظام نور د هېواد اړتیاوې نه شي پوره کولای
پاکستان د کړنګ پر غاړه د سیاسي او اداري بدلونونو له جدي اړتیا سره مخ دی. د دغه هېواد د کورنیو چارو وزیر محسن نقوي ویلي، که څوک یې مني او که نه، اوسنی حکومتي او اداري نظام نور اغېزناک نه دی او د هېواد د ښه مدیریت لپاره د نویو اداري واحدونو او صوبو جوړول ضروري دي.
پاکستان د کړنګ پر غاړه؟ د پاکستان د اداري اصلاحاتو غوښتنه
محسن نقوي د پاکستان اقتصادي سرمشریزې ۲۰۲۶ ته په وینا کې وویل، د نویو صوبو جوړول او پراخې اداري اصلاحات باید د سیاسي ګوندونو ترمنځ د ملي اجماع له لارې ترسره شي، نه دا چې یوازې په کنفرانسونو او سیمینارونو کې پرې بحث وشي.
د هغه په وینا، سیاسي مشران باید تر هغه د خبرو مېز پرې نه ږدي، څو د هېواد د مهمو اصلاحاتو په اړه ګډ تفاهم ته ونه رسېږي.
اقتصادي ستونزې او د واک غیرمتمرکزول
د کورنیو چارو وزیر وویل، پاکستان له کلونو راهیسې د پورونو او بودجوي کسر له ستونزو سره مخ دی، خو بنسټیزې ستونزې یې لا هم نه دي حل شوې.
هغه ټینګار وکړ چې د واک او اداري صلاحیتونو غیرمتمرکزول، د نویو اداري واحدونو جوړول او د سیمهییزې استازولۍ پیاوړتیا کولی شي د حکومتولۍ کیفیت ښه کړي او د نوو مشرانو د راڅرګندېدو زمینه برابره کړي.
پاکستان د کړنګ پر غاړه؟ ځوانان د عادلانه نظام غوښتونکي دي
محسن نقوي وویل، د پاکستان ځوانان لنډمهاله مرستو ته اړتیا نه لري، بلکې داسې نظام غواړي چې د وړتیا پر بنسټ پکې د کار او پرمختګ فرصتونه برابر وي.
هغه د سوداګرۍ له ټولنې هم وغوښتل چې د اداري اصلاحاتو او ښه حکومتولۍ په برخه کې خپل ملاتړ زیات کړي.
کارپوهان باور لري، که د اصلاحاتو په اړه سیاسي هوکړه رامنځته نه شي، نو پاکستان د کړنګ پر غاړه له لا زیاتو سیاسي او اقتصادي ننګونو سره مخ کېدای شي، ځکه د نویو صوبو او اداري بدلونونو بحث یو ځل بیا د هېواد په سیاسي ډګر کې تود شوی دی.
