د ایران اټومي مذاکرات؛ ترمپ وایي خبرې به د دوشنبې په ورځ پیل شي

د ایران اټومي مذاکرات؛ د امریکا ولسمشر ډونالډ ترمپ ویلي، د ایران او امریکا ترمنځ د ایران د اټومي مذاکراتو نوی پړاو به د دوشنبې په ورځ پیل شي. هغه هیله څرګنده کړې چې دواړه هېوادونه به د تهران د اټومي پروګرام په اړه یوې هوکړې ته ورسېږي.

ترمپ د خبریالانو سره په خبرو کې وویل چې د هرمز تنګي د وضعیت په اړه هم یوه هوکړه شوې، خو د هغې د جزییاتو په اړه یې څه ونه ویل. نوموړي زیاته کړه چې د ایران د اټومي مذاکراتو تمرکز به د تهران د اټومي وسلو د جوړولو د مخنیوي پر موضوع وي.

د ایران اټومي مذاکرات؛ ترمپ: پوځي برید مو د ډیپلوماسۍ لپاره وځنډاوه

د امریکا ولسمشر ادعا وکړه چې هغه د ایران پر ضد د یوه پراخ پوځي برید امر لغوه کړی، ځکه د امریکا ځینو سیمه‌ییزو متحدانو له واشنګټنه غوښتي وو چې د پوځي اقدام پر ځای د خبرو اترو او ډیپلوماسۍ لاره خپله کړي. د ایران اټومي مذاکرات

ترمپ وویل، اوس د اختلافونو د حل لپاره د خبرو فرصت برابر شوی او واشنګټن هڅه کوي چې د سیاسي تفاهم له لارې کړکېچ پای ته ورسوي.

ایران لا د ترمپ د څرګندونو په اړه رسمي دریځ نه دی اعلان کړی

سره له دې چې ترمپ د خبرو د پیل خبر ورکړی، ایراني چارواکو تر اوسه د دغو څرګندونو په اړه رسمي غبرګون نه دی ښودلی او د راتلونکو مذاکراتو د څرنګوالي په اړه یې هم څه نه دي ویلي.

په همدې حال کې د هرمز تنګي امنیت او د ایران اټومي مذاکرات د سیمې له مهمو سیاسي او امنیتي موضوعاتو څخه ګڼل کېږي. دغه تنګی د نړۍ د نفتو د لېږد له مهمو سمندري لارو څخه دی او هر ډول کړکېچ پکې د نړیوالو انرژۍ بازارونو اغېزمنولای شي. د راپورونو له مخې، د مذاکراتو د اعلان له خپرېدو وروسته د نفتو نړیوالو بیو هم د راټیټېدو نښې ښودلې دي.