د افغانستان ملاتړ د ملګرو ملتونو له مهمو ژمنو څخه دی. د یوناما مشرې رباب فاطمې د دغه سازمان د ۸۱مې کالیزې په مناسبت له افغانانو سره د همکاریو پر دوام ټینګار کړی دی.
د افغانستان لپاره د ملګرو ملتونو د سرمنشي ځانګړې استازې او د یوناما مشرې رباب فاطمې ویلي چې دغه سازمان به د افغانانو د ژوند د ښهوالي لپاره خپلو هڅو ته دوام ورکړي.
نوموړې د شنبې په ورځ، د اکتوبر پر ۲۴مه، د ملګرو ملتونو د جوړېدو د ۸۱مې کالیزې په مناسبت په یوه ویډیويي پیغام کې دا څرګندونې کړې دي.
فاطمې ویلي، ملګري ملتونه د جګړو له ویجاړیو وروسته د سولې، خبرو اترو او د هېوادونو ترمنځ د همکاریو د پیاوړتیا لپاره جوړ شوي دي.
هغې زیاته کړې چې افغانستان په ۱۹۴۶ کال کې د دغه نړیوال سازمان غړیتوب ترلاسه کړی او له هغه وخت راهیسې ملګرو ملتونو د افغانانو ترڅنګ خپل حضور ساتلی دی. د افغانستان ملاتړ
د افغانستان ملاتړ؛ ملګري ملتونه پر خپلو ژمنو ټینګار کوي
د یوناما مشرې ویلي، ملګرو ملتونو او شریکانو یې د طبیعي پېښو، وچکالیو، جګړو او بېځایه کېدو پر مهال له افغانانو سره د مرستو هڅې کړې دي.
نوموړې ټینګار کړی چې د بشري اړتیاوو پوره کول، د انساني کرامت ساتنه او د خلکو لپاره د غوره فرصتونو برابرول د سازمان له مهمو موخو څخه دي.
فاطمې د افغانستان د خلکو زغم او هڅې ستایلې دي.
هغې ویلي، ښځو، نارینهوو، ځوانانو، قومي مشرانو، ښوونکو، روغتیايي کارکوونکو او د بشري مرستو فعالانو له ګڼو ستونزو سره سره خپلو فعالیتونو ته دوام ورکړی دی.
د افغانستان راتلونکی او د افغانانو رول
د یوناما مشرې ویلي چې افغانستان له سترو ننګونو سره مخ دی، خو د دغه هېواد خلک د ستونزو د حل لپاره وړتیاوې او ظرفیتونه لري.
هغې د خپل ماموریت پیل ته په اشارې ویلي چې د افغانستان خلکو، فرهنګ او تاریخي میراث ته درناوی لري.
نوموړې ژمنه کړې چې د افغانانو غوښتنو او نظرونو ته به غوږ نیسي او د هغوی ترڅنګ به کار کوي.
د فاطمې په وینا، د افغانستان ملاتړ یوازې په بېړنیو بشري مرستو پورې محدود نه دی، بلکې د خلکو د ژوند د ښهوالي او فرصتونو د پراختیا هڅې هم پکې شاملې دي.
هغې زیاته کړې چې د افغانستان راتلونکی د دغه هېواد په خلکو پورې اړه لري او ملګري ملتونه به د یوه ژمن شریک په توګه ورسره پاتې شي.
د یوناما د مشرې د څرګندونو له مخې، د افغانستان ملاتړ به د انساني کرامت، همکاریو او د افغانانو د اړتیاوو د پوره کولو په برخو کې دوام ولري.
