د انسټګرام نوی فیچر؛ کاروونکي به تر ۹۰ دقیقو اوږدې ویډیوګانې خپرې کړي
د انسټګرام نوی فیچر به محتوا جوړوونکو ته د ۹۰ دقیقو ویډیوګانو د خپرولو زمینه برابره کړي. دا اسانتیا اوس په محدود ډول ازمویل کېږي.
انسټاګرام د اوږدو ویډیوګانو د خپرولو لپاره پر یوې نوې اسانتیا کار کوي چې له مخې به یې محتوا جوړوونکي وکولی شي تر ۹۰ دقیقو پورې ویډیوګانې خپرې کړي.
د دې بدلون موخه دا ده چې انسټاګرام یوازې د لنډو ریلز ویډیوګانو شبکه پاتې نه شي، بلکې د پوډکاسټونو، مرکو او نورو اوږدو خپرونو لپاره هم کارول شي.
د انسټاګرام مشر ادم موسېري او د محصولاتو د برخې مرستیالې تېسا لیونز د دې نوې اسانتیا په اړه معلومات شریک کړي دي.
د انسټګرام نوی فیچر څنګه کار کوي؟
د وړاندې شویو معلوماتو له مخې، محتوا جوړوونکي به وکولی شي خپلې اوږدې ویډیوګانې له لنډو ریلز ویډیوګانو سره ونښلوي.
د بېلګې په توګه، یو کاروونکی به د مرکې یا پوډکاسټ لنډه برخه په ریلز کې وګوري او بیا به د بشپړې خپرونې د لیدلو لپاره اړوندې اوږدې ویډیو ته لاسرسی ومومي. د انسټګرام نوی فیچر
د انسټګرام نوی فیچر په لومړي پړاو کې په برازیل کې له ځینو محتوا جوړوونکو سره ازمویل شوی دی. په امریکا کې هم ټاکل شویو محتوا جوړوونکو ته د ازموینې زمینه برابره شوې ده.
دا اسانتیا تر اوسه ټولو کاروونکو ته نه ده وړاندې شوې او د عمومي فعالېدو کره نېټه یې هم نه ده څرګنده.
د ویډیوګانو د تنظیم او عاید ترلاسه کولو امکانات
انسټاګرام د «سریز» یا لړۍ په نوم پر یوې بلې اسانتیا هم کار کوي، څو محتوا جوړوونکي خپلې ویډیوګانې د موضوع او برخو له مخې تنظیم کړي.
دا کار به لیدونکو ته اسانتیا برابره کړي چې د یوې خپرونې بېلابېلې برخې په منظم ډول پیدا او وګوري.
شرکت همدارنګه غواړي د تلوېزیون لپاره د خپل اپلېکېشن امکانات پراخ کړي، څو کاروونکي اوږدې ویډیوګانې پر لویو پردو هم وګوري.
خو د محتوا جوړوونکو لپاره د عاید موضوع لا بشپړه روښانه نه ده.
د لومړنیو معلوماتو له مخې، انسټاګرام دا مهال داسې پلان نه دی اعلان کړی چې د دغو اوږدو ویډیوګانو د اعلانونو عاید له محتوا جوړوونکو سره ووېشي.
سره له دې، محتوا جوړوونکي کولی شي له سوداګریزو شرکتونو سره د سپانسرۍ او تبلیغاتي همکاریو له لارې عاید ترلاسه کړي.
که د انسټګرام نوی فیچر په پراخه کچه فعال شي، ښايي د اوږدو ویډیوګانو په بازار کې له یوټیوب سره د انسټاګرام سیالي هم زیاته کړي.
خو د دې بدلون بریالیتوب به تر ډېره د لیدونکو له غبرګون، د ویډیوګانو د موندلو له اسانتیا او د محتوا جوړوونکو لپاره له اقتصادي فرصتونو سره تړلی وي.
