افغانستان د روسیې له خصوصي سکټور سره د همکارۍ هوکړه‌لیک لاسلیک کړ

ځړول شوی:جون 24, 2022 لخوا ځړول شوی:مسعود تبصرې:0

د سوداګرۍ او پانګونې خونې مشر یو هوکړه لیک لاسلیک کړ

د سوداګرۍ او پانګونې خونې سرپرست د روسیې سن پېټرزبورګ ته په خپل سفر کې د دې هېواد له خصوصي برخې سره یو هوکړه‌لیک لاسلیک کړی دی. له دې هوکړه‌لیک سره به د کابل او مسکو تر منځ راکړه-ورکړه ډېره شي.

موږ اړتیا لرو چې د دولت تر ریاست پورې تړون ولرو

د سوداګرۍ او پانګونې خونې سرپرست محمد یونس مومند وايي: «ضرورت دی چې د دولت په دولت موږ یو قرارداد ولرو، څو د روسیې حکومت موږ ته دوه توکي چې غنم او تېل دي، په ارزانه توګه راکړي.»

د سوداګرۍ او پانګونې خونه وایي، مسکو ژمنه کړې چې د هېواد سوداګرو ته د وېزې ورکړه اسانه کړي. بل‌خوا د کرنې او مالدارۍ خونه وایي، روسیه د هېواد د کورنیو محصولاتو لپاره مناسب بازار دی.

د کرنې او مالدارۍ خونې مرستیال میرویس حاجي‌زاده وايي: «روسیه یو ښه مارکېټ دی، په تېره چې په حیرتان بندر کې ورسره د ټرانزیټ صادرات ولرو. اوس‌مهال کولای شو، وریجې او کشمش، کچالو او پیاز صادر کړو، ځکه د روسیې ورته اړتیا ډېره ده او که حکومت اجازه راکړي، موږ کولای شو صادرات وکړو.»

نور یی ولوله | افغانستان له روسیې سره د سوداګرۍ پراختیا په موخه هوکړه‌لیک لاسلیکوي

نور یی ولوله | هرات کې د سوداګرو مېرمنو له خوا د دایمي بازار جوړېدل

ورته مهال د اقتصادي چارو کارپوه دریا خان بهیر وايي: «د روسي تولیداتو لپاره د افغانستان د بازارونو پرانیستل او روسیې د افغانستان صادرات، زما په نظر که سم مدیریت شي او سیاسې ستونزې رامنځ‌ته نه‌شي، اقتصاد ورسره ښه کېږي او د توکو بیې هم ورسره راټیټېږي.»

د سوداګرۍ او پانګونې خونې د شمېرو له مخې، افغانستان په ۲۰۲۱ زېږدیز کال کې روسیې ته د څه باندې څلور مېلیون ډالرو په ارزښت صادرات دلودل او په همدې کال کې افغانستان ته د روسیې د وارداتو کچه څه باندې ۷۸۰ مېلیون ډالرو ته رسېده.

ځواب دلته پرېږدئ

ستاسو برېښناليک به نه خپريږي.

زموږ په خبر پاڼه کې ګډون وکړئ
وروستي مقالې، دندې، وړیا، تفریحي خبرونه په مستقیم ډول ستاسو ان باکس ته وړاندې کړئ.
170000 پیرودونکي دلته دي.