اړوند خبرونه:
اروپايي اتحادیه: روغتیايي خدماتو ته د افغان نجونو او ښځو لاسرسی اړین دی
د روغتیا نړیوال سازمان ویلي چې په افغانستان کې د دې سازمان تر ملاتړ لاندې ۸۰ سلنه روغتیايي مرکزونه د بودیجې د کمښت له امله د ۲۰۲۵ کال د جون میاشتې له پیل سره د بندېدو له خطر سره مخ دي.
یوه خبرپاڼه چې د دې ادارې لخوا د دوشنبې په ورځ، د مارچ په ۱۷مه خپره شوې، ویلي: «که فوری اقدام ونشي، له ۲۲۰ څخه زیات روغتیايي مرکزونه به د ۲۰۲۵ کال د جون میاشتې له پیل سره بند شي، چې په پایله کې به ۱.۸ میلیونه نور افغانان د روغتیايي لومړنیو خدماتو د لاسرسي له حقه بې برخې شي.»
دا اداره وایي چې د مارچ په میاشت کې هم د مالي ملاتړ د کمښت له امله ۱۶۷ مرکزونه بند شوي، چې د دې کار په پایله کې په ۲۵ ولایتونو کې ۱.۶ میلیونه خلک د ژوند ژغورونکي روغتیايي خدماتو څخه محروم شوي دي.
د روغتیا نړیوال سازمان د افغانستان نماینده، ډاکټر ادوین سنیسا سلوادور، وویل: «دا بندیدو یوازې د راپور شمېرې نه دي؛ بلکې د هغو میندو او ماشومانو ژوند بیانوي چې د زیږون امنیت او د ژوند ژغورونکي واکسین څخه بې برخې کیږي.»
دغه اداره زیاتوي، که څه هم ځینې مرسته کوونکي د افغانستان د روغتیا سکتور ملاتړ ته دوام ورکوي، خو مالي مرستې په بې سارې توګه کمې شوې دي او د پراختیایي مرستو لومړیتوبونه بدل شوي دي.
په دې وروستیو کې د سرخکان ۱۶ زره مشکوکې پېښې او د دې ناروغۍ له امله ۱۱۱ مړینې ثبت شوې دي. دا خبرداری په داسې حال کې ورکړل شوی چې افغانستان په ګڼو بحرانونو، په ځانګړې توګه د روغتیا په برخه کې، اخته دی.
