د امریکا بهرنیو چارو وزارت ویاند وايي، کېدای شي داعش پر امریکا هم برید وکړي
امریکا د کندهار او روسیه کې د داعش له بریدونو وروسته افغانستان کې د داعش له پیاوړي کېدو اندېښنه په ډاګه کوي.
د دې وزارت ویاند مېتیو مېلر چې پرون یې په واشنګټن کې د خبریالانو پوښتنو ته ځوابونه ورکول وویل، متحدهایالاتو روښانه کړې چې د داعش خراسان ډلې په اړه باید هوښیار و اوسوو او د دې هدف لپاره دوی له خپلو متحدانو سره په ګډه کار کوي.
د ترهګرو په امن ځای د افغانستان نه بدلېدل
هغه په افغانستان کې د داعش خراسان څانګې د ګواښ او فعالیت په اړه وویل:
“د افغانستان په اړه باید ووایم چې موږ تل ویلي، مهمه ده چې دا هېواد نور د ترهګرو لپاره په امن پټنځای بدل نهشي، هغوی چې غواړي امریکا ته زیان ورسوي. موږ په افغانستان کې ترهګرو سره د حساب کولو په برخه کې خپله ژمنتیا ښودلې ده، خو موږ طالبانو ته هم روښانه کړې چې په افغانستان کې دننه له ترهګرو ډلو سره مبارزه د دوی په ګټه ده. ”
نور ولولئ: طالبان: په ایران کې وروستۍ چاودنې په کلکه غندو
نور ولولئ: سي ای اې: په ایران کې چاودنې افغانستان کې د داعش خراسان کړې
نور ولولئ: امریکايي سناتوران: داعش د روسیې په څېر، پر امریکا هم برید کولی شي
د طالبانو حکومت د امریکا د بهرنیو چارو وزارت ویاند د دې څرګندونو په اړه غبرګون نهدی ښودلی، خو له دې وړاندې یې بېلابېلو چارواکو ویلي چې داعش د افغانستان لپاره لوی خطر نهدی.
په افغانستان کې د داعش وروستي بریدونه
داعش خراسان څانګې واک ته د طالبانو له بیا ځلي رسېدو وروسته، په طالب چارواکو د بریدونو په ګډون، د افغانستان په بېلابېلو ولایتونو کې خونړۍ حملې کړي دي، خو طالبان بیا هم داعش له منځه تللی بولي.
دارنګه د امریکا د بهرنیو چارو پخواني وزیر مایک پومپیو نن په خپله ایکسپاڼه په مسکو کې د داعش ډلې برید ته په اشارې لیکلي: “دا برید ښيي چې د داعش ګواښ لا تر اوسه پای ته نهدی رسېدلی. ”
ښاغلي پومپیو د نیوکې په ډول دا هم لیکلي: “د افغانستان په اړه د بایډن چلند دا ګواښ لا زیات کړی دی.”
له دې وړاندې جمهوري غوښتونکي سناتور لیندسي ګراهام په افغانستان کې د داعش خراسان ډلې په مرکزونو د بریدونو غوښتنه کړې وه.
په کندهار کې پر کابل بانک د داعش وروستی برید طالبانو ته خطرناک پیغام لري. بل په روسیه کې د داعش له برید وروسته طالبانو ددغه ډلې برید ته د لومړي ځل لپاره ترهګریز برید نوم ورکړ.
