سفر خبرونه

ایورېسټ ته لومړنی افغان ختونکی وايي غواړي افغانستان کې غرختنه دود کړي

په نړۍ کې د غره تر ټولو لوړې څوکې د همالیا ایوریسټ ته ختلی لومړنی افغان سمیع الدین صدیقي وايي له دې کار څخه یې یوه موخه په افغانستان کې غرختنې او ګرځندوی ته د ودې ورکولو سره مرسته ده

صدیقي د ۲۰۲۳ ميلادي کال د مې په ۱۷مه د ایورېسټ څوکې ته ورسېد. د همالیا د غرونو د لړۍ دا لوړه څوکه د نیپال او تبت ترمنځ موقعیت لري او د ځمکې له سطحې ۸۸۴۹ متره لوړوالی لري.

صدیقي وايي، اوس هڅه کوي چې د افغانانو لپاره په دې برخه کې خدمت وکړي.

صدیقي وايي د ایوریسټ غره ته د ختلو لپاره یې شپږ میاشتې چمتوالی نیولی وو چې درې میاشتې یې د غره ختلو تمرینونه کړي او یوه میاشت په نیپال کې وو. وايي، په پنځو ورځو کې یې وکولای شول د ایوریسټ څوکې ته پورته شي.

په دغه هڅه کې د ستونزو په اړه نوموړی وايي:

د اکسېجن کموالی تر ټولو لویه ننګونه ده: “هر څومره چې پورته ځئ په هوا کې د اکسیجن کچه کمیږي، د ایوریسټ په څوکه کې د اکسیجن کچه شپږ فیصده وي. د یویشت سلنه اکسیجن په پرتله چې موږ یې لرو. نو کله چې اکسیجن نه وي پر بدن باندې زیات اغېز لري.”

نور ولولئ: د ماګر دواړې پښې شوې دي؛ خو څنګه د نړۍ تر ټولو لوړ غره ته وخوت؟

صدیقي په دغه مزل کې چې هر کال یې په ترڅ کې په لسګونو غرختونکي مري، د خپلو کړاوونو په اړه وايي: “په دویمه ورځ زه ناروغ شوم، په درېیمه ورځ زما لارښود راته وویل چې ناروغ یې، ملګرو راته وویل چې د مړي په شان یې. خو الحمدالله په درېیمه ورځ بیرته روغ شوم.”

صدیقي په افغانستان کې زیږیدلی، خو ژوند او زده کړې یې په امریکا کې کړي دي

نوموړی وايي د ایوریسټ غره ته له ختلو سره یې وغوښتل افغان ځوانانو ته ووايي چې دوی هم کولای شي دغه شان لوی کارونه ترسره کړي.

نوموړی زیاتوي: “په افغانستان کې د ګرځندوی له پلوه د غره ختلو په برخه کې د اقتصادي ودې لپاره یو فرصت شته. نو ما ځکه د افغان پیکس بنسټ پیل کړ. افغان پیکس د ورزش، خوندیتوب او د طبیعت د ساتنې له نظره په افغانستان کې د غرونو په برخه کې پر پرمختګ ټينګار کوي.”

ایوریسټ څوکې ته لومړنی افغان غرختونکي سمیع الدین صدیقي له تېرو دریو کلنو راهیسې په بامیان ولایت کې د سکي لوبو لپاره کار کوي او تمه لري چې وکولای شي دې ورزش ته په افغانستان کې نوره وده ورکړي.

مسعود

مسعود د حقایقو مدافع دی. هغه په ​​​​دې باور دی چې دا مهمه ده چې خبرې وکړئ او د هغه څه لپاره مبارزه وکړئ چې سم دي، پرته له دې چې لګښت څه وي.

اړوند خبرونه

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button