د امریکا او متحده عربي اماراتو ولسمشرانو ویلي، دواړه هېوادونه به د ټکنالوژۍ او اقتصادې ودې په برخه کې ګډ کار کوي

د متحده عربي اماراتو ولسمشر شیخ محمد بن زاید النهیان د امریکا د ولسمشر جوبایډن او کاملا هېرېس سره په لیدنه کې په غزه کې پر روان وضعیت، د دواړو هېوادونو تر منځ د اقتصادي ودې په فرصتونو، د منصوعي ځیرکتیا پر تبادلې، د رینیوابل انرژۍ او نورو اړخونو بحثونه کړي دي.

د ۱۹۷۱ م. کال را وروسته چې متحده عربي امارات جوړ شوي، ددغه هېواد د ولسمشر لومړنی سفر ته چې امریکا متحده ایالاتو ته یې کوي.

د متحده عربي اماراتو ولسمشر ته د امریکا ولسمشر او مرستیالې جلا، جلا لیدنې تنظیم کړي وې.

په منځني ختیځ کې د اماراتو رول

په دې لیدنه کې د امریکا ولسمشر جوبایډن ویلي، په منځني ختیځ کې د اماراتو رول اړین دی. هغه وویل، د اسرائیلو او فلسطین ترمنځ په روانه جګړه کې اماراتو د مرستو په رسولو او په غزه کې له بې ځایه شویو ته د سرپنا په برابرولو کې د پام وړ اقدامات ترسره کړي دي.

همدارنګه جوبایډن په دې لیدنه کې د متحده عربي امارات له هند وروسته دویم لوی شریک بللی دی.

نور ولولئ:  د متحده عربي اماراتو اقتصاد به ۵ سلنه وده وکړي

نور ولولئ: ایران او متحده عربي اماراتو د جامع اقتصادي همکاریو تفاهم لیک لاسلیک کړ

نور ولولئ: متحده عربي امارات او بشري مرستې

په ورته وخت کې  شیخ محمد ویلي، په غزه کې باید د اسرائلو او حماس ترمنځ اوربند رامنځته او په منځنۍ ختیځ کې اوسنی ترینګلی حالت له منځه یوړل شي.

د امریکا د ولسمشر مرستیالې کاملا هېرېس د اماراتو له ولسمشر سره په ځانګړې لیدنه کې د سوډان پر روان وضعیت اندېښنه څرګنده کړې او ویلي یې دي چې امارات په دې برخه کې له امریکا او نړیوالې ټولنې سره مرسته کولی شي.

د ګډو همکاریو ډېرېدل

د متحده عربي اماراتو ولسمشر شیخ محمد بن زاید النهیان په داسې حال کې واشنګټن ته سفر کوي چې دغه هېواد په اقتصادي او ټکنالوژیک ډګر کې په خورا چټکۍ سره د ودې په حال کې دی.

ددغه هېواد ولسمشر به له امریکا سره د اقتصادي ودې، مصنوعي ځیرکتیا، چاپیریال ساتنې او نورو برخو کې تړونونه هم لاسلیک کړي.

امریکا ته د ولسمشر شیخ محمد سفر نړیوالو رسنیو مهم بللی او ویلي دي چې د اماراتو او امریکا لپاره به نوی باب پرانېزي او د دواړو هېوادونو له هغه فرصتونو به ګټه پورته کړل شي، چې لري یې او له یوه او بل سره په کې همکاري کولی شي.