ایمنیسټي انټرنشنل یا د بښنې نړیوال سازمان له طالبانو غوښتي چې نور د نجونو پر مخ ښوونځي پرانیزي
د طالبانو د له لوري د نجونو پر مخ د ښوونځیو تړل کېدو ۱۰۰۰ ورځې پوره شوې، چې د ولس په منځ کې یې غوغا جوړه کړه او پر ټولنیزو رسنیو یې سخت غبرګون وښود.
د دغو زر ورځو له پوره کېدو سره، د بښنې نړۍوال سازمان له دغې ډلې وغوښتل چې د نجونو پر مخ دې د ښوونځیو دروازې بېرته پرانیزي.
د زده کړو له حق د نجونو محرومېدل
دغه سازمان ویلي، چې افغان نجونې د طالبانو د تبعیضي او ناعادلانه سیاستونو له امله د زده کړو له حق څخه بې برخې دي.
د بښنې نړۍوال سازمان د جمعې په ورځ (د غبرګولي ۲۵مه) پر اېکس ټولنیزې شبکې خپره کړې اعلامیه کې لیکلي، چې د طالبانو سیاستونه د نړۍوالو قوانینو خلاف دي.
نور ولولئ: یوازې په غزني کې «۲۴۹» ښوونځي ودانۍ نه لري
نور ولولئ: کرزی طالبانو ته؛ د نجونو پر مخ ښوونځي او پوهنتونونه پرانیزی
د بشري حقونو دغه سازمان د «زده کړې جرم نه دی» هشتګ په کارولو سره لیکلي، چې طالبان باید سمدستي ټول منځني او له هغه پورته ښوونځي د نجونو پر مخ پرانیزي.
پر افغانستان د طالبانو د بیا ځلي حاکمیدو یوه میاشت وروسته، دغه ډلې هغه ښوونځي بېرته پرانیستل چې د کرونا ویروس د خپرېدو له امله تړل شوي وو، خو د نجونو د شپږم ټولګي څخه پورته د ښوونځیو دروازې وتړلې.
د نجونو د ښوونځیو په اړه د طالبانو نامعلوم دریځ
طالبانو د نجونو د ښوونځیو د تړلو په وخت کې ولس ته ژمنه ورکړه چې په نصاب کې بدلون او مناسب چاپیریال له رامنځته کېدو وروسته به د نجونو پر مخ ښوونځي پرانیزي، خو له دې سره، سره دوی له ولس سره کړي ژمنې پوره نه کړې او د ښوونځیو دروازې لا هم تړلي دي.
په ۱۴۰۱ کال کې په پکتیا ولایت کې د نجونو پر مخ څو ورځې ښوونځي پرانیستل شول چې که دغه موضوع رسنیزه شوه، نو طالبانو سمدلاسه وتړل. نجونو د ښوونځیو د تړل کېدو له امله لاریون وکړ، چې وروسته بیا طالبانو د لاریون کوونکو نجونو وروڼه، پلرونه، ترونه او د کورنۍ نور غړي ونیول او زنداني یې کړل.
په ورته مهال نړیوال سازمانونه او د بشري حقونو بنسټونه له طالبانو غواړي چې د نجونو پر مخ ښوونځي پرانیزي، خو له دې سره سره لا هم طالبانو نه دې افغان ولس او نه هم نړیوالو سازمانونو دغه مشروع غوښتنې ته پام وکړ.
