د افغانستان د خبریالانو مرکز وايي چې طالبانو په سمنګان ولایت کې د پژواک خبریال نیولی دی

د افغانستان د خبریالانو مرکز یکشنبه فبروري ۱۱ (سلواغه ۲۲) په یوې اعلامیې کې وویل چې طالبانو د سمنګان په ولایت کې د پژواک خبري اژانس خبریال نیولی دی.

دغه مرکز د خبریال سیف الله کریمي ‌د نیول کېدو په اړه خواشیني ښودلې او له قید او شرط پرته یې د هغه د خوشې کېدو غوښتنه کړې ده.

په اعلامیې کې ویل شوي چې په سمنګان کې د طالبانو د والي دفتر تېره ورځ کریمي وربللی و، او له تېرې ورځې راهېسې د هغه په اړه هېڅ معلومات نه شته.

د مالیې د لوړېدو په تړاو راپور

دغه مرکز د یوې سرچېنې په حواله لیکلي دي: «لس ورځې مخکې سیف الله کریمي د مالیاتو د لوړېدو په اړه د سمنګان ولایت د رستورانونو او هوټلونو د مالکانو د اعتراض په اړه د دغه ولایت د مستوفي بشیر احمد نعماني سره د مرکې غوښتنه کړې وه او بیا والي عبدالاحد فضلي ته د موضوع په اړه راپور ورکوي او بیا والي کریمي احضار کوي.»

اعلامیه وایي چې کریمي د چهارشنبې په ورځ هم د والي‌ دفتر ته احضار شوی او منشي ورته ویلي وو چې مسئله حل شوې ده، خو تېره ورځ یې بیا وربللی او توقیف کړی دی.

نور ولولئ:  د افغانستان ښځینه خبریالانو بنسټ: په ۲۰۰ کې ۴۵ سلنه خبریالانې وزګارې دي

نور ولولئ:  افغان ښځې له طالبانو د دوی پر زده‌کړو او کار د محدودیتونو ختمول غواړي

نور ولولئ: د بې پولې خبریالانو سازمان: “د طالبانو د اسختباراتو له لوري د خبریالانو نیول غندو”

د افغانستان د خبریالانو مرکز وایي چې د والي یو ساتونکي دغه خبریال وهلی دی او له هغه سره زور زیاتی هم شوی دی. دا مرکز وايي چې طالبان باید د رسنیو د قانون په اساس، چې د طالبانو حکومت هم د اجرا وړ بللی، د کار اجازه ورکړي او کریمي ‌دې ژر تر ژره خوشې کړي.

طالبانو تر اوسه څه نه دي ویلي

سیف الله کریمي له شاوخوا اوو میاشتو راهېسې په سمنګان کې د پژواک لپاره کار کوي. د پژواک په خبري اژانس کې یوې سرچېنې د کریمي نیول تائید کړل، خو د هغه د نیول کېدو د علت په اړه یې معلومات ورنکړل. تر دې دمه د طالبانو حکومت د کریمي‌د نیول کېدو په اړه څه نه دي‌ ویلي.

د افغانستان د خبریالانو مرکز وايي‌ چې تېرکال له خبریالانو سره د زور زیاتي ۱۶۸ پېښې شوې دي، چې ۶۱ یې د توقیف او نیول کېدو قضیې دي. دا مرکز وایي چې لا هم دوه خبریالان د طالبانو په زندان کې دي.

په ۲۰۲۱ کال د اګست په میاشت کې په افغانستان کې د طالبانو له بیا واکمن کېدو وروسته، په رسنیو باندې کلک محدودیتونه ولګول شول چې له کبله یې اکثریت رسنۍ یا وتړل شوې او یا فعالیت پرېښود.