د طالبانو امیر په خپل اختریز پیغام کې د طالبانو تر منځ اختلافات ژور بللي دي
د طالبانو مشر مولوي هبتالله اخوندزاده د کوچني اختر په مناسبت خپل اختریز پیغام کې د دغې ډلې له غړو غوښتي چې د پخوانیو مجاهدینو په څېر له خپلمنځي اختلاف او خودخواهۍ څخه ځانونه وساتي.
دا په داسې حال کې ده چې تازه داسې راپورونه خپاره شوي چې د طالبانو مشر د خپل واک د ټينګولو په لټه دی؛ خو د دغې ډلې یو شمېر غړي یې له اوامرو سرغړونه کوي.
د طالبانو مشر په خپل اختریز پیغام کې د دې پر ځای چې د قانون له مخې په نظم ټينګار وکړي، د جوماتونو له ملا امامانو غوښتي چې خلک «اصلاح» کړي.
د طالبانو امیر د نجونو د زده کړو په څه نه دي ویلي
هبتالله اخوندزاده یو ځل بیا د امر بالمعروف او نهی عنی المنکر وزارت د فعالیتونو په پراخېدو ټينګار کړی او ویلي دي چې له ولایتونو وروسته به د متنفذینو او علماوو شوراګانو د جوړېدو لړۍ ولسوالیو ته وغځېږي.
د طالبانو د مشر په دغه پیغام کې د نجونو او ښځو زدهکړو ته هېڅ اشاره شوې نه ده.
نور ولولئ: د قطر لومړي وزیر او ملا هیبت الله تر منځ پټه ناسته
نور ولولئ: ملا هیبت الله ته د ملا فضل الرحمان ګواښ؛ تاسو به یا پاکستان انتخابوی یا ټي ټي پي
د طالبانو مشر په اختریز پیغام کې ښکاري چې د بېپيلوټه الوتکو له ګزمو وروسته یې په دریځ کې نرمي راغلې. نوموړي له هېوادونو غوښتي چې د افغانستان هوايي حریم ته درناوی وکړي او نږدې اړیکې ورسره وپالي. د هغه په خبره، طالبان له ټولو هېوادونو سره د ښو اړیکو غوښتونکي دي.
پر نوموړي د بې پیلوټه ګزمې
د سولې په چارو کې د دولت وزارت پخواني مرستیال عبدالله خنجاني د ملا هبتالله اخوندزاده اختریز پیغام ته په غبرګون کې لیکلي چې نوموړي د بېپیلوټه الوتکو له ګزمو وړاندې ویلي و چې ۲۰ کاله نور به هم له لویدیځ سره وجنګېږي؛ خو په خبره یې، د ډرون الوتکو له ګزمو وروسته یې له نړۍ سره د ښو اړیکو غوښتنه کړې ده.
خنجاني لیکلي: «د بېپیلوټه الوتکو له ګزمو وړاندې د ملا هبتالله پیغام: ۲۰ کاله نور به هم له تاسې (غرب) سره وجنګېږو. د بېپيلوټه الوتکو له ګزمو وروسته د ملا هبتالله پیغام: موږ له نړۍ سره د ښو اړیکو غوښتونکي یو. دا سړی[هبتالله] که د جهاد، شهادت او استشهاد ډېر شوقي دی، ولې له شهید کېدو څخه د وېرې له کبله تښتي؟»
د طالبانو د مشر اختریز پیغام داسې مهال خپور شوی چې په مسکو کې د داعش له برید وروسته، بېپيلوټه الوتکې چې ویل کېږي امریکا پورې اړوند دي، د کندهار په ګډون د ځينو نورو ولایتونو په فضا کې ګزمې کړې دي. مولوي هبتالله له دغو ګزمو وروسته خپل ځای بدل کړی او د دغه ولایت په یوه پوځي مرکز کې ځای په ځای شوی دی.
