اړوند خبرونه:
مودي د هند په ټاکنو کې د صدراعظمۍ چوکۍ وګټله
د هند د بهرنیو چارو وزیر متحده عربي اماراتو ته په سفر تللی دی
غزې ته د متحده عربي اماراتو بشري مرستې
د هند دفاع وزیر «راجنات سینګ» چین کې د شانګهای همکارۍ سازمان د دفاع وزیرانو په غونډه کې د افغانستان د امنیت، ثبات او پرمختګ لپاره د خپل هېواد پر ژمنې ټینګار وکړ، او ویې ویل چې هند به د کابل تر ټولو لوی پرمختیایي ملګری پاتې شي.
د هند دفاع وزیر راجنات سینګ، چین کې د شانګهای همکارۍ سازمان د دفاع وزیرانو په غونډه کې په خپله وینا کې وویل: “هند په کلکه د افغانستان د امنیت او ثبات ملاتړ کوي او دا هیواد د خپلې پراختیایي پالیسۍ له لومړیتوبونو څخه ګڼي.”
هغه زیاته کړه چې هند په تېرو دوو لسیزو کې د افغانستان د ترټولو لوی پرمختیایي شریک په توګه مهم رول لوبولی دی او په افغانستان کې د پراختیایي پروژو او ظرفیت لوړولو پروګرامونو ته ژمن دی.
سینګ ټینګار وکړ چې نوی ډیلي به د افغانستان له خلکو سره د پوهنې، روغتیا، زیربناوو او بشري ظرفیت لوړولو په برخو کې خپلې همکارۍ ته دوام ورکړي، او هدف یې د یو باثباته، خوندي او پرمختللي افغانستان په جوړولو کې مرسته کول دي.
هند د هغو هېوادونو له ډلې څخه دی چې په تېرو دوو لسیزو کې یې په افغانستان کې په زیربنایي، تعلیمي او بشري پروژو کې میلیاردونه ډالر پانګونه کړې ده. د نوي افغان پارلمان جوړول، د سلما بند، روغتیايي پروژې، تعلیمي بورسونه، او د افغان ځواکونو روزنه په دې موده کې د هند له مهمو مرستو څخه دي.
هند هم له افغانستان سره پراخې کلتوري او تاریخي اړیکې لري او تل یې د سیمهییزې همکارۍ له لارې د افغانستان په بیارغونه کې خپل رول ساتلی دی.
