د چین یو ۶ کسیز جګپوړی پلاوی “د پاکستان له پیغام” سره کندهار ته رسېدلی دی
د چین یو جگپوړی پلاوی کندهار ته تللی چې د طالبانو له مشرتابه سره د پاکستاني طالبانو په تړاو د اسلام اباد اندېښنې شریکې کړي. په دغه پلاوي کې د چین شپږ تنه ډپلوماټان شامل دي او ټاکل شوې نن د کندهار لپاره د طالبانو له والي ملا شیرین اخوند سره وګوري.
یوې باوري سرچینې افغانستان انټرنشنل ته وویل چې دغه پلاوی د دوشنبې په ورځ “د لیندۍ پر پنځمه” مازیګر کندهار ته ورسېد او په مقدماتي ډول یې د طالبانو له ویاند ذبیح الله مجاهد سره وکتل.
د ملا هیبت الله له نږدې کس سره لیدنه
سرچینه وایي، ” دغه پلاوی نن سه شنبه د کندهار له والي حاجي ملاصاحب [مولوي شیرین اخوند] سره ګوري، چې اصلي موضوع ټي ټي پي ده، خو اسلامي امارت به یې سیاسي تړونونه بولي”.
د سرچینې په وینا، چینایی پلاوی غواړي د طالبانو له مشر مولوي هبت الله اخوندزاده سره هم وګوري او د پاکستاني طالبانو په تړاو د اسلام اباد او بیجنګ اندېښنې ورسره مخامخ شریکې کړي، خو طالب مشر له پلاوي سره نه ګوري.
نور ولولئ: المرصاد: اسلام اباد د خپلو ګټو په خاطر چین د سیمې نیابتي جګړو ته راکاږي
نور ولولئ: د طالبانو بهرنیو چارو وزارت: “له چین سره مو په دوه اړخیزو اړیکو خبرې وکړې”
د پاکستان د ملي عمل پلان کمیټې تېره اونۍ اعلان وکړ چې په بلوچستان کې د بلوڅ جنګیالیو خلاف پراخ پوځي عملیات پیلوي.
اسلام اباد دغو عملیاتو ته د چین له سختو فشارونو وروسته زړه ښه کړی.
په پاکستان کې د وضعیت خرابیدل
د بلوچستان تر لسو ډېرو ولسوالیو، کراچۍ او خیبر پښتونخوا کې پر چینایي او پاکستاني اهدافو د بلوڅ جنګیالیو وروستیو بریدونو پاکستان د ټي ټي پي او بلوڅ جنګیالیو ترمنځ د همکاریو له اړخه اندېښمن کړی او په دې باور دی چې دغه بریدونه د بلوڅ بېلتون پالو له مخکینیو څو لسیزو دودیزو جګړه ییزو تاکتیکونو سره متفاوت او ډېر مرګوني دي.
یوې سرچینې چې د بلوچستان چارې له نږدې څاري، افغانستان انټرنشنل ته وویل “داسې ښکاري چې اسلام اباد د چینایانو له لارې غواړي د بلوچستان له عملیاتو وړاندې د طالبانو د حکومت مشرتابه او تصمیم نیوونکې مرجع دې ته وهڅوي چې د ټي ټي پي او بلوڅانو د همکاریو، یا په قبایلي سیمو کې د پاکستاني جنګیالیو د عملیاتو د پراخېدو مخه ونیسي”.
د پاکستان پوځ اندېښمن دی چې که په بلوچستان کې د بلوڅ جنګیالیو خلاف عملیات پیل کړي، په وزیرستان او قبایلي سیمو کې به پاکستاني طالبان او نورې وسله والې ډلې د سیمو د نیولو لپاره خپل بریدونه لا ډېر کړي.
