اړوند خبرږنه:
د ایران ولسمشر: له افغانستانه د اوبو د حق د ترلاسه کولو په اړه خبرې کوو
طالبانو په کابل کې د ایران له نوي سفیر سره لیدلي
پاکستاني رسنیو په چین کې د درې اړخیزې غونډې وروسته راپور ورکړ چې اسلاماباد او ا.ا د دوه اړخیزو اړیکو د ښه کولو لپاره د یو مهم ګام په توګه د ډیپلوماتیکو اړیکو د پیاوړتیا لپاره د نوي سفیرانو د ټاکلو هوکړه کړې ده.
د ډان ورځپاڼې د راپور له مخې، دا پریکړه په بیجینګ کې په یوه غیر رسمي درې اړخیزه غونډه کې وشوه چې د پاکستان د بهرنیو چارو وزیر محمد اسحاق ډار، د ا.ا د بهرنیو چارو سرپرست وزیر امیر خان متقي او د چین د بهرنیو چارو وزیر وانګ یي پکې ګډون کړی و.
وانګ يي د چهارشنبې په ورځ، د غویي ۳۱مه اعلان وکړ چې دواړو خواوو د ډیپلوماتیکو اړیکو د لوړولو لپاره “څرګنده لیوالتیا” ښودلې او په اصولو کې یې هوکړه کړې چې په نږدې راتلونکي کې سفیران تبادله کړي. چین د دې هوکړې هرکلی وکړ او ژمنه یې وکړه چې د کابل او اسلاماباد ترمنځ د اړیکو د ښه کولو ملاتړ به وکړي.
دا تړون د کلونو کړکېچ وروسته، په ځانګړې توګه د پاکستان له خوا د افغان خاورې په اړه د تحریک طالبان پاکستان (ټيټيپي) د شتون تورونو وروسته، په اړیکو کې د نسبي ښهوالي نښه ده.
ډان ورځپاڼې راپور ورکړ چې دا غونډه د چین د هغو هڅو یوه برخه وه چې غواړي سیمهییز تاوتریخوالی کم کړي او د اقتصادي اړیکو پروژې پراخې کړي، په شمول د چین-پاکستان اقتصادي دهلیز (CPEC) کې د افغانستان شاملول.
که څه هم تر اوسه پورې هېڅ هېواد د ا.ا حاکمیت په رسمیت نه دی پېژندلی، خو چین مخکې خپل سفیر کابل ته لېږلی او د ا.ا څخه یې یو ډیپلومات ترلاسه کړی دی.
پاکستان او ا.ا اوس مهال یوازې د یو بل په سفارتونو کې شارژدافیر لري، او د سفیرانو تبادله د اړیکو د لا رسمي کولو په لور یو ګام ګڼل کیږي.
دا پرمختګ په داسې وخت کې راځي چې پاکستان د ټيټيپي له خوا د بریدونو له زیاتوالي سره مخ دی، په ځانګړې توګه په خیبر پښتونخوا او بلوچستان کې، او په وار وار یې له ا.ا څخه غوښتنه کړې چې د دې ډلې پر وړاندې اقدام وکړي. خو ا.ا دا تورونه رد کړي او ادعا کوي چې د افغانستان خاوره د هېڅ هېواد پر ضد نه کارول کیږي.
