روسیه؛ د کنسرت پر تالار برید کې د وژل شویو شمېر ۱۱۵ تنه شو
![russia (2)](https://afghannow.net/wp-content/uploads/2024/03/Russia-2-2-780x470.jpg)
په مسکو کې وروستی برید خونړی بلل شوی او د وژل شویو شمېر یې ۱۱۵ کسانو ته ورسېده
د روسیې امنیتي ادارې وايي، د پلازمېنې مسکو په یوه مرکزي تالار کې د ډزو یوه پېښه کې د وژل شویو کسانو شمېر لږ تر لږه ۱۱۵ کسانو ته ورسېد او شاوخوا ۱۴۰ نور ټپیان دي.
د روسیې دولتي خبري اژانس په رپوټ کې ویل شوي، ځايي نندارچیان د موسیقۍ یوه کنسرت پیل ته منتظر و، چې پېښه رامنځته شو او وروسته د تالار چت هم اور واخیست. رپوټ کې ویل شوي، ځینې برخې نړېدلې دي.
د روسیې بهرنیو چارو وزارت دا ”یو ترهګریز برید” بللی دی.
د یاد برید مسئولیت
پر انټرنېټ یوه ناتائید شوي بیان کې ویل شوي داعش وسله والې ډلې د دې برید مسوولیت منلی دی، خو روسي چارواکو رسماً په دې هکله څه نه دي ویلي.
امریکايي چارواکو په امریکا کې د بي بي سي ملګرې رسنۍ سي بي ایس ته ویلي، داسې استخباراتي معلومات یې درلودل، چې داعش ډله غواړي پر روسیې برید وکړي. بل لور د امریکا ولسمشرۍ ماڼۍ ویلي د روانې میاشتې لومړیو کې یې په مسکو کې د ”خلکو پر ډېره ګڼه ګوڼه” د احتمالي برید کېدو په تړاو خبرداری ورکړی و.
نور ولولئ: اوکراین ادعا کوي چې درې روسۍ جنګي جیټ راپرځولې
نور ولولئ: روسیه کې بې ساری وسلهوال برید؛ د کنسرت تالار کې ۴۰ کسان وژل شوي
د مسکو له ځايي وخت سره سم د ګهیځ تر یوې بجې پورې د روسیې ولسمشر ولادیمر پوتین مخامخ د دې پېښې په هکله وینا نه ده کړې، خو د دې هېواد دولتي خبري اژانس تاس د مرستیالې لومړۍ وزیرې تاتیانا ګولیکووا له قوله لیکلي چې ولسمشر پوتین د ټپیانو لپاره د ژر ښه کېدو هیله څرګنده کړې.
طالبانو هم دغه وروستی برید ترهګریز یاد کړی
د روسیې فدرالي امنیتي ځواک (ایف ایس بي) مسوولین وايي، ځانګړي ځواکونه هم د پېښې ځای ته رسېدلي دي.
د روسیې بهرنیو چارو وزارت ویاندې ماریا زخاروا له نړیوالې ټولنې غوښتي چې دا پېښه وغندي، چې دا یې ”شیطاني جرم” بولي. نوموړې وايي: ”د خلکو ژغورنې لپاره په ټول وس او توان سره هڅه کېږي.”
د مسکو ښاروال سیرګي سوبیانین د پېښې له قربانیانو سره خواخوږي څرګنده کړې: ”زه د پېښې قربانیانو له خپل-خپلوانو سره خواخوږي څرګندوم.”
هاخوا د طالبانو رژیم هم د مسکو وروستی برید غندلی او دغه برید یې یو ترهګریز عمل بللی دی. له همدې امله خلک ورباندې نیوکې کوي چې دوی هم په افغانستان کې ورته بریدونه کول.