په دې روغتیايي لارښود کې ولولئ چې د لوږې او تندې د مخنیوي لپاره روژه کې څه وخورو او وڅښو؟ ترڅو د روژې په میاشت کې د وزن له زیاتېدو او ستړیا څخه وژغورل شو.
د روژې په مبارکه میاشت کې د ډېری خلکو پوښتنه دا وي چې روژه کې څه وخورو او وڅښو؟ ترڅو د روژې په جریان کې له بېسارې لوږې، تندې او ماليخولیا څخه وژغورل شو. روغتیاپالان وايي چې په روژه کې د خوړو په انتخاب کې لږ بدلون کولی شي ستاسو د روژې کیفیت او روغتیا په بېساري ډول ښه کړي.
روژه کې څه وخورو او وڅښو، ولې په روژه کې ژر وږي او تږي کېږو؟
اصلي لامل دا دی چې موږ د افطار او پیشلمي پر مهال داسې خواړه خورو چې په وینه کې د شکر کچه ژر لوړوي او بېرته یې ژر راغورځوي. ساده وریجې، سپینه ډوډۍ، خواږه، په غوړیو کې سره شوي خواړه، مالګین توکي او ګاز لرونکي څښاک هغه لاملونه دي چې سړی ژر وږی او تږی کوي.
که غواړئ چې وږي نه شئ، ستړي نه شئ او وزن مو زیات نه شي، باید درې اصول په پام کې ونیسئ: فایبر، پروټین او سالم غوړي (لکه د زیتون غوړي).
۱ روژه کې څه وخورو او وڅښو، کومې مېوې د روژې لپاره ګټورې دي؟
کله چې د مېوو بحث کېږي، باید پوه شو چې ټولې مېوې یو ډول نه دي. هغه مېوې چې فایبر لري او ورو هضمېږي، معده د ډېر وخت لپاره ډکه ساتي. مڼه، آمروت، نارنج، مالټه او انار غوره انتخابونه دي. برعکس، کیله، انګور او ام باید لږ وخوړل شي، ځکه د وینې شکر ژر لوړوي.
مهمه مشوره: مېوه وخورئ، خو جوس ترې مه جوړوئ؛ ځکه په جوس کې فایبر له منځه ځي او یوازې بوره یې پاتې کېږي چې ژر مو وږي کوي.
۲. د ترکارۍ او سبزیو رول
ترکارۍ تر ټولو قوي خواړه دي چې نه مو وږي کوي او نه مو وزن زیاتوي. هره شپه باید بادرنګ، رومیان، کاهو، شنې پاڼې او ګازره وخورئ. دا خواړه معده ډکه ساتي او کالوري یې کمه وي. پام مو وي چې ترکارۍ باید خامه یا په لږو اوبو کې پخه شوې وي، نه په غوړیو کې سره شوې.
۳. کوم خواړه مو نه وږي کوي؟ (د پروټین رول)
د دې پوښتنې په ځواب کې چې روژه کې څه وخورو او وڅښو؟ پروټین تر ټولو مهم ځای لري. د مرغانو غوښه، کب، هګۍ، دال او نخود پروټین لري چې معده ناوخته تشوي او تر سهاره مو ماړه ساتي. د ډوډۍ او وریجو په برخه کې باید احتیاط وکړئ؛ یوازې ۴-۵ کاشوغې وریجې یا یوه کوچنۍ ډوډۍ بسنه کوي.
۴. د تندې د مخنیوي لارې چارې
د تندې د کمولو لپاره بادرنګ، کاهو، نارنج، کیوي، هنډوانه، مڼه او مستې تر ټولو غوره انتخابونه دي. بل لور ته، مالګین خواړه، اچار، تېره مساله، سره مرچ، ډېر چای او قهوه ستاسو تنده بېساري زیاتوي، نو هڅه وکړئ ترې لرې پاتې شئ.
۵. غوره افطار او ډوډۍ څنګه وي؟
غوره روژه ماتی په یوه ګیلاس نورماله اوبو او یوې یا دوو خرماوو پیل کړئ. تر لمانځه وروسته اصلي ډوډۍ وخورئ. یو مناسب پلیټ باید لاندې برخې ولري:
د مرغانو غوښه (پروټین).
د سبزیو او ترکاریو سلاد.
یوه کوچنۍ ډوډۍ.
لږ د زیتون غوړي او یوه مڼه یا آمروت.
۶. پېشلمی (سحري)؛ د انرژۍ اصلي سرچینه
که پیشلمی خراب وي، ټوله ورځ به بېوسه یاست. په پیشلمي کې هګۍ، دال یا نخود، مستې او مڼه وخورئ. له کېک، بسکېټ، خوږو او مالګینو شیانو په کلکه ډډه وکړئ.
لنډه دا چې: که غواړئ پوه شئ چې روژه کې څه وخورو او وڅښو؟ نو یوازې درې خبرې په یاد ولرئ: هره شپه پروټین وخورئ، ترکارۍ ډېرې وکاروئ او د وچې ډوډۍ کچه کمه کړئ. په دې ډول به یوه صحي او هوسا روژه تېره کړئ.
