پاکستان کې وروستیو بریدونو زور اخیستی او ملا هیبت دغه بیدونه ناروا بللي دي
د پاکستان د جماعت اسلامي ډلې مشر سراج الحق وايي په پاکستان کې د ترهګرۍ پر ضد “د طالبانو د مشر ملا هبت الله اخوندزاده فتوی له حده ډېر د ستاینې وړ ګام دی.”
هغه دا هم ویلي چې په افغانستان کې د امنیت لپاره اړینه ده چې پاکستان کې امن وي.
سراج الحق د دې تر څنګ پخپل ټوېټر پاڼه لیکلي “د سیمې پرمختګ او خوشحالي د دواړو هېوادونو له امنیت سره تړلي او دښمن نه غواړي چې دا دواړه هېوادونه له یوه بل سره نږدې پاتې شي.”
نوموړي زیاته کړې چې د کابل او اسلام اباد تر منځ د ورورولۍ اړیکې به د راتلونکو نسلونو د ښېګڼې او په سیمه کې د غوړېدلي سوداګرۍ سبب شي.
طالبانو دغه فتوا په رسمي ډول نه ده خپره کړې
خو تر اوسه د طالبانو حکومت په رسمي ډول د داسې کومې فتوی په اړه څه نه دي ویلي.
نوموړي دا څرګندونې داسې مهال کړې چې اوونۍ وړاندې د طالبانو د حکومت د دفاع چارسمبالي وزیر ملا محمد یعقوب مجاهد اعلان وکړ چې که څوک له افغانستانه بهر د جهاد په نیت ځي، جنګ یې جهاد نه دی.
نوموړي په یوه وینا کې چې د طالبانو تر واک لاندې ملي تلویزیون یې ځینې برخې خپرې کړي ویلي “اوس خو د امیر امر دی. اطاعت یې واجب، فرض او لازم دی. که څوک له افغانستانه بهر د جهاد په نیت ځي، دغه جهاد یې جهاد نه بلل کېږي.”
د جهاد پر مقصد ځان پوهول ضروري دي
هغه خپلو پوځيانو او د دوی مشرانو ته دې وینا کې ویلي، چې هم پخپله او هم خپل ملګري پر جهاد، د جهاد پر مقصد او د نظام پر اهمیت پوه کړي او دا چې د خپلو غوښتنو او “خواهشاتو په وجه باید ستونزې او مشکلات جوړ” نه کړي.
نور ولولئ: پاکستان کې ناامني؛ لوی درستیز یې وروستیو پېښو کې افغانان ښکېل وبلل
نوموړي ټینګار پر دې کړی چې اوس باید د ده په وینا “د پراخو قربانیو” پایله کې د لاس ته راغلې ثمرې یا رامنځته شوي نظام د ساتنې او ځواکمنتیا لپاره کار وشي.
د طالبانو دفاع وزیر دا څرګندونې داسې مهال کړې، چې د پاکستان بېلابېل جګپوړي چارواکي په دغه هېواد کې د بریدونو او امنیتي پېښو له ډېرېدو سره تور لګوي، چې ګوندې دغه بریدونه په افغانستان کې پلانېږي او دا چې بریدګر هم د افغانستان له خاورې ور اوړي.
د افغانستان لخوا له دغې دریځ سره هم مهاله د پاکستان بېلابېلو سیاسي، نظامي او ان اسلامپالو مشرانو بیا د افغان خوا ضد څرګندونې کړي او ان طالبان یې د دوحې تړون پر نه عملي کولو هم تورن کړي.
